ორგანიზაცია პარტნიორობა ადამიანის უფლებებისთვის ინფორმაციით, დღეს, 28 ოქტომბერს გორის რაიონულმა სასამართლომ ბავშვის ფიზიკური დასჯის საქმეზე გამამტყუნებელი განაჩენი გამოიტანა.

რატომ არის მნიშვნელოვანი: PHR-ის განცხადებით, ბავშვზე მოძალადეს 5 წლით თავისუფლების აღკვეთა და 2000 ლარის ოდენობით ჯარიმა შეუფარდა. პროცესები წელიწადნახევარი გრძელდებოდა.

  • PHR-ი იმედოვნებს, რომ აღნიშნული გადაწყვეტილება შეცვლის ქვეყანაში არსებულ მიდგომას ბავშვებზე ძალადობასა და ფიზიკურ დასჯასთან დაკავშირებით.

დეტალები: 2021 წლის მაისში ბავშვმა ხილი უნებართვოდ მოკრიფა, მეპატრონეებმა კი მას ამის გამო სიტყვიერი და ფიზიკური შეურაცხყოფა მიაყენეს, გააშიშვლეს და ქუჩაში ამ მდგომარეობაში გაუშვეს.

  • ორგანიზაციის განცხადებით, ერთ-ერთმა მეპატრონემ ბავშვს პლასტმასის მილით ფიზიკური დაზიანება მიაყენა ფეხზე;
  • "ხოლო მეორემ ბავშვი ხიდან ძალით ჩამოათრია, რამდენჯერმე გაარტყა სახეში ხელი, ამოარტყა პანღური, მიაყენა სიტყვიერი შეურაცხყოფა, ძალის გამოყენებით წელზემოთ გააშიშვლა, აიძულა შარვლის გახდა და ამ მდგომარეობაში ბავშვი ქუჩაში გაუშვა".

PHR-ის განცხადებით, სასამართლო დაეყრდნო ადამიანის უფლებათა ევროპული სასამართლოს გადაწყვეტილებებს და განმარტა, რომ ამგვარი მოპყრობა ბავშვის მიმართ ღირსების შემლახველია.

  • სასამართლომ პირი დამნაშავედ ცნო საქართველოს სისხლის სამართლის კოდექსის 144 მე-3 პრიმა მუხლის მე-2 ნაწილის "ზ" ქვეპუნქტით წარდგენილ ბრალდებაში.
  • ორგანიზაციაში აცხადებენ, რომ საქმეზე ბავშვის ადვოკატის მოთხოვნით, სასამართლომ პროკურატურას დაავალა ბავშვის დაზარალებულად ცნობა დამამცირებელი მოპყრობის მუხლით (ადამიანის უფლებების ევროპული კონვენცია მე-3 მუხლი — წამებისგან დაცვა).