მანამდე გამართული აუდიენცია მეფე ჩარლზსა და ახალ პრემიერმინისტრს შორის ბუკინგემის სასახლეში ძალაუფლების სიმბოლური გადაცემა იყო.

რატომ არის მნიშვნელოვანი: დიდი ბრიტანეთის პრემიერმინისტრი, ლიზ ტრასი არჩევიდან 45 დღეში გადადგა.

• დღეს, 25 ოქტომბერს კი რიში სუნაკი დიდი ბრიტანეთის პრემიერმინისტრი ოფიციალურად გახდა.
• ბრიტანეთში, წელს უკვე მეორედ კონსერვატიული პარტიის დეპუტატებმა პარტიის თავმჯდომარე და ქვეყნის პრემიერმინისტრი აირჩიეს.
• სუნაკი დიდი ბრიტანეთის ისტორიაში ყველაზე ახალგაზრდა პრემიერია ბოლო 2 საუკუნის განმავლობაში.

სუნაკმა პატივისცემა გამოხატა მისი წინამორბედის ლიზ ტრასის მიმართ და აქვე დასძინა, რომ "დაშვებული იყო გარკვეული შეცდომები, რომელიც ბოროტი ან ცუდი განზრახვით არ იყო გამოწვეული".

• შემდეგ კი აღნიშნა, რომ ნაწილობრივ, ამ შეცდომების გამოსწორების გამო აირჩიეს ის — "და ეს სამუშაო დაუყოვნებლივ დაიწყება".
• თავის პირველივე გამოსვლაში ახსენა ყოფილი პრემიერმინისტრი, ბორის ჯონსონი და აღნიშნა, რომ "წარმოუდგენელი მიღწევებისთვის" ყოველთვის იქნება მისი მადლობელი.
• "ვიცი, რომ ის დამეთანხმება, მანდატი, რომელიც ჩემმა პარტიამ მოიპოვა 2019 წელს, არ არის ერთი ინდივიდის საკუთრება, ეს არის მანდატი, რომელიც ყველას გვეკუთვნის და გვაერთიანებს".

დეტალები: სუნაკმა თავის მიმართვაში ძირითადი ყურადღება ქვეყნის ეკონომიკურ მდგომარეობას დაუთმო — თქვა, რომ ამ მხრივ, ვითარება მძიმეა და მთავრობის დღის წესრიგში "ეკონომიკურ სტაბილურობასა და ნდობას" დააყენებს.

• მისი თქმით, ეს რთული გადაწყვეტილებების მიღებას ნიშნავს.
• ამ კონტექსტში აღნიშნა ისიც, რომ პუტინის ომმა უკრაინაში მთელი მსოფლიოს მასშტაბით ენერგეტიკული ბაზრებისა და მიწოდების ქსელების დესტაბილიზაცია გამოიწვია.

პირველ ოფიციალურ მიმართვაში ახალმა პრემიერმა აღნიშნა, რომ გააერთიანებს ქვეყანას, არა სიტყვით, არამედ საქმით — "ამ მთავრობას ექნება ერთიანობა, პროფესიონალიზმი და ანგარიშვალდებულება ყველა დონეზე".

• სუნაკი COVID-19-თან დაკავშირებულ ფინანსურ გამოწვევებსაც შეეხო.
• "მე მესმის რამდენად რთული სამუშაო მაქვს შესასრულებელი, რათა აღვადგინო ნდობა ყოველივე ამის შემდეგ".
• "ასე რომ, ვდგავარ თქვენს წინაშე, მზად ვარ ვმართო ჩვენი ქვეყანა მომავალი, თქვენი საჭიროებები პოლიტიკაზე მაღლა დავაყენო, ავაშენო მთავრობა, რომელიც წარმოადგენს ჩვენი პარტიის საუკეთესო ტრადიციებს".
• "ერთად შეგვიძლია წარმოუდგენელ შედეგებს მივაღწიოთ".
• "შევქმნით მომავალს, რომელიც ღირსია ამდენი გაღებული მსხვერპლისა და ხვალინდელ და ყოველ მომდევნო დღეს იმედით ავავსებთ".
• "მთავრობა, რომელსაც მე ვხელმძღვანელობ, მომავალ თაობას, თქვენს შვილებსა და შვილიშვილებს არ დაუტოვებს იმ ვალს, რომლის გადასახდელადაც ჩვენ ძალიან სუსტები ვიყავით", — განაცხადა ბრიტანეთის პრემიერმა.