ნიუ-იორკის სასამართლომ კევინ სპეისის წინააღმდეგ სექსუალური ძალადობის შესახებ ერთ-ერთი სარჩელი არ დააკმაყოფილა. სარჩელი ენტონი რაპს ეკუთვნის, რომლის მტკიცებითაც 1986 წელს, როცა თავად 14 წლის იყო, სპეისიმ საკუთარ ბინაში დაპატიჟა და მასთან სექსუალური კავშირის დამყარებაც სცადა.

ენტონი რაპი ახლა 50 წლისაა და მან სარჩელი 2020 წლის სექტემბერში შეიტანა, ზარალის ანაზღაურებისთვის კი 40 მილიონ დოლარს ითხოვდა. კევინ სპეისიმ მის წინააღმდეგ წაყენებული ბრალდებები თავიდანვე უარყო. ნიუ-იორკის სასამართლოს ნაფიცი მსაჯულების გადაწყვეტილებით, ენტონი რაპმა ვერ დაამტკიცა, რომ კევინ სპეისიმ მის მიმართ არასასურველი სექსუალური კავშირის დამყარება სცადა.

ფოტო: Getty Images

შეგახსენებთ, რომ კევინ სპეისი ენტონი რაპის ბრალდებების შემდეგ გეიდ დაქამინგაუთდა. "მთელი ჩემი ცხოვრების მანძილზე ურთიერთობა მქონდა ქალებთანაც და კაცებთანაც. ახლა კი, ცხოვრების ამ ეტაპზე ვამბობ, რომ მირჩევნია ვიცხოვრო, როგორც გეი კაცმა", — განაცხადა მსახიობმა 2017 წელს.

რამდენიმე თვის წინ სასამართლოს გადაწყვეტილებით, კევინ სპეისის House of Cards-ისთვის $31 მილიონის გადახდა დაეკისრა. ამის მიზეზი სერიალის გადაღებების დროს კულისებში სავარაუდო სექსუალური შევიწროების ფაქტებია. კევინ სპეისი სექსუალურ შევიწროებაში House of Cards-ის რვა თანამშრომელმა დაადანაშაულა.

კევინ სპეისის შესახებ საჯაროდ გავრცელებული სექსუალური ძალადობის არაერთი ბრალდების გამო ბანქოს სახლის მწარმოებელ კომპანია MRC-ის მოუწია, რომ სერიალის მეექვსე სეზონის გადაღებები შეეჩერებინა, სცენარი ხელახლა გადაეწერათ, კევინის გმირი შოუდან ამოეღოთ და 13 ეპიზოდის ნაცვლად 8 სერია გადაეღოთ, რამაც მათ ათეულობით მილიონის ზარალი მოუტანა.