ამერიკელი პოლიტოლოგი და სახელმწიფო მოღვაწე, ზბიგნევ ბჟეზინსკი, 89 წლის ასაკში, საავადმყოფოში გარდაიცვალა. ინფორმაცია ამის შესახებ მისმა შვილმა, მიკა ბჟეზინსკიმ გაავრცელა.

ზბიგნევ ბჟეზინსკი წარმოშობით პოლონელი იყო, მისი ოჯახი 1930-იანი წლების მიწურულს ჯერ კანადაში გადასახლდა, შემდეგ კი - ამერიკის შეერთებულ შტატებში. ბჟეზინსკი 1950-იან წლებში აშშ-ს მოქალაქე გახდა. ის ამავე პერიოდიდან ასწავლიდა ჰარვარდის უნივერსიტეტში, მოგვიანებით კი კოლუმბიის უნივერსიტეტში გადავიდა. ის ამერიკის არაერთი პრეზიდენტის მრჩევლად მუშაობდა საგარეო ურთიერთობების საკითხებში თუმცა, ყველაზე თვალსაჩინო იყო მისი მუშაობა პრეზიდენტ ჯიმი კარტერის ადმინისტრაციაში, 1977-1981 წლებში, ეროვნული უსაფრთხოების საკითხებში მრჩევლის პოზიციაზე. სწორედ ამ პერიოდს დაემთხვა ირანში "ტყვეებს კრიზისი" (შაჰის ჩამოგდება და ამერიკის საელჩოს ხელში ჩაგდება), ასევე, საბჭოთა კავშირის შეჭრა ავღანეთში.

ბჟეზინსკი მხარს უჭერდა აშშ-ს ძლიერ საგარეო პოლიტიკას, ასევე, ნატოს გაფართოებას ევროპის აღმოსავლეთით, რის გამოც მას რუსეთში "რუსოფობ რასისტს" უწოდებდნენ. 2008 წლის აგვისტოში, როცა რუსეთი საქარველოში შემოიჭრა, ბჟეზინსკი პრეზიდენტობის კანდიდატ ბარაკ ობამას მრჩეველი იყო. მან ვლადიმერ პუტინი ჰიტლერს შეადარა საქართველოში შემოჭრის გამო, რადგან მისივე თქმით, 1938 წელს, ჰიტლერმა ჯარები ჩეხოსლოვაკიაში სწორედ იქ მცხოვრები ეთნიკური გერმანელების "დაცვის" საბაბით შეიყვანა. სწორედ "რუსეთის მოქალაქეების დაცვის" მოტივით შემოიჭრა რუსეთი 2008 წელს საქართველოში.

ბჟეზინსკი არაერთი მნიშვნელოვანი პუბლიკაციის ავტორია, ის ბოლო პერიოდში აკადემიურ საქმიანობას ეწეოდა.