ამის შესახებ გამართულ ბრიფინგზე ნათია ლეთოდიანმა ისაუბრა და აღნიშნა, რომ პროკურატურამ სტატუსის მინიჭებაზე უარი უკვე მეორედ თქვა.

რატომ არის მნიშვნელოვანი: კობა ლეთოდიანი ერთ-ერთია იმ პირთა შორის, რომელმაც გავრილოვის ღამეს დაზარალდა.

  • პოლიციამ ადგილზე სპეცრაზმი გამოიყვანა ისე, რომ ამის შესახებ ტერიტორიაზე შეკრებილი ადამიანები არ გააფრთხილა.
  • გამოიყენა რეზინის ტყვიები და ცრემლსადენი გაზი, შედეგად კი რამდენიმე მოქალაქემ თვალი, ზოგმა კი მხედველობა დაკარგა.
  • დაშავდა დაახლოებით 240 ადამიანი, მათ შორის, ჟურნალისტები.

დეტალები: ნათია ლეთოდიანის განცხადებით, გუშინ საგამოძიებო უწყებისგან მიიღეს დადგენილება, სადაც წერია, რომ მიმდინარეობს გამოძიება და ჯერ არ დაუდგენიათ "მის წინააღმდეგ რამდენად სწორად არის გამოყენებული ღონისძიებები".

  • "ეს არის ყოვლად დამცინავი დადგენილება არამარტო მამაჩემის, არამედ ყველა დაზარალებულის მიმართ, რომლებმაც აუნაზღაურებელი ტრავმა მიიღეს 20 ივნისის ღამეს".

ლეთოდიანის განცხადებით, 2019 წლის 20 ივნისიდან 3 წლის თავზე, პროკურატურამ ვერ დაადგინა, არის თუ არა "ორივე თვალით დაბრმავებული ადამიანი" დაზარალებული.

  • "მამაჩემმა, კობა ლეთოდიანმა, რომელმაც ცალი თვალი დაკარგა აფხაზეთის ომში და მეორე თვალი დაკარგა 20 ივნისს გავრილოვის ღამეს, პარლამენტის წინ უკვე მეორედ მიიღო უარი პროკურატურისგან".
  • "მე, როგორც ერთი რიგითი ადამიანი, მოქალაქე და როგორც დაბრმავებული ადამიანის ოჯახის წევრი, ყველა გზას და ბერკეტს გამოვიყენებ, რომ უსამართლობის ეს ჯაჭვი გავწყვიტოთ და სამართალს მივაღწიოთ".

On.ge დამატებითი ინფორმაციისთვის პროკურატურას დაუკავშირდა, პასუხის მიღებისთანავე შემოგთავაზებთ.