აქციის მონაწილეები მერიასთან ორშაბათს, დილის 9 საათზე იკრიბებიან.

რატომ არის მნიშვნელოვანი: აქციის მონაწილეები ითხოვენ, დედაქალაქის მერმა აიღოს პასუხისმგებლობა ვაკის პარკში მომხდარ შემთხვევაზე.

  • ახალრეაბილიტირებულ შადრევანში ბავშვებს დენმა დაარტყა — 13 წლის მოზარდი გარდაიცვალა, 2 ბავშვი კი რამდენიმე დღე კლინიკაში მკურნალობდა.
  • მომხდარზე გამოძიება სისხლის სამართლის კოდექსის 240-ე პრიმა მუხლის პირველი და მეორე ნაწილით გრძელდება, რაც ელექტრო ობიექტზე უსაფრთხოების წესების დარღვევას გულისხმობს, რასაც ადამიანის სიცოცხლის მოსპობა მოჰყვა.

დეტალები: ორგანიზატორების განცხადებით, ჩვენი მოქალაქეობრივი პასუხისმგებლობაა, არავის შერჩეს დანაშაული, რომელმაც 13 წლის მოზარდის დაღუპვა გამოიწვია.

  • "მერმა და მერიის თანამშრომლებმა უნდა აიღონ მორალური, სამართლებრივი და პოლიტიკური პასუხისმგებლობა მომხდარზე. გელოდებით ყველას, უთხარით თქვენი სათქმელი დამნაშავეებს!" — ვკითხულობთ ფეისბუქის ივენთზე.

რას ამბობენ მერიაში: კახა კალაძის მოადგილის, ანდრია ბასილაიას განცხადებით, ვაკის პარკის შადრევნის რეაბილიტაცია აგვისტოში დასრულდა და მას შემდეგ სისტემური ტესტირება მუდმივად ტარდებოდა.

  • მისივე თქმით, მუნიციპალიტეტის, ასევე, კონტრაქტორი კომპანიის თანამშრომლები ყოველდღიურ რეჟიმში იყვნენ ჩართულ შადრევანში და რაიმე შემთხვევა არც ერთხელ დაფიქსირებულა.

შადრევნის რეაბილიტაცია 12 ოქტომბერს დასრულდა. პროექტზე შპს გრინსერვისი+ მუშაობდა.

  • ოფიციალურად წარდგენილ დოკუმენტაციაში ბოლო მიღება-ჩაბარების აქტში წერია, რომ გრინსერვისი+-მა ჩააბარა, ხოლო მერიის გარემოს დაცვის საქალაქო სამსახურმა მიიღო ინსპექტირების ანგარიშით დადასტურებული შადრევნისა და კასკადის სარეაბილიტაციო სამუშაოები.

  • ინსპექტირების ანგარიშის დოკუმენტში კი აღნიშნულია, რომ სამუშაოები შესრულებულია საპროექტო-სახარჯთაღრიცხვო დოკუმენტაციის შესაბამისად და შესაბამისობაშია საქართველოში მოქმედ სამშენებლო ნორმებთან და წესებთან, თუმცა არ არის ნახსენები უსაფრთხოების ზომები.

გრინსერვისი+-ის მფლობელის, ლაშა ფურცხვანიძის წინააღმდეგ 2013 წელს სამეწარმეო საქმიანობაში უკანონო მონაწილეობის და უკანონო შემოსავლის ლეგალიზაციის საქმეზე გამოძიება მიმდინარეობდა.

  • 2018 წელს TI აღნიშნავდა, რომ მიუხედავად ამისა, ეს კომპანია 2013 წლის იანვრიდან მონაწილეობს სახელმწიფო შესყიდვებში და 2018 წლის პირველ ნოემბრამდე 21 მლნ ლარის ღირებულების ელექტრონული ტენდერები მოიგო.
  • 2021 წელს ფლანგვის დეტექტორი წერდა, რომ მხოლოდ 2020 წელს გრინსერვისმა 5 ტენდერში უკონკურენტოდ გაიმარჯვა და 7 წელში ტენდერების გზით დაახლოებით 41 256 287 ლარი აქვს მიღებული.
  • თავად ფურცხვანიძე მომხდარს წინასწარგანზრახულ ქმედებას უკავშირებს — ამბობს, რომ სხვა ახსნა არ აქვს და პასუხისმგებელია იმ სამუშაოებზე რაც ჩაატარეს, რადგან ყველა ნორმა დაცული იყო.