Joker: Folie à Deux-ში ხოაკინ ფენიქსთან ერთად ლედი გაგაც მიიღებს მონაწილეობას. ლედი გაგა ფილმში დიდი ალბათობით ჰარლი ქუინის როლს შეასრულებს, რასაც მარგო რობი უკვე გამოეხმაურა. შეგახსენებთ, რომ The Suicide Squad-ში მარგო რობი ჰარლი ქუინს განასახიერებდა, ახლა კი მსახიობი ამბობს, რომ ძალიან გაუხარდება, თუ პერსონაჟის როლს ლედი გაგა ითამაშებს.

"ჰარლი ქუინის როლში ლედი გაგას დანახვა ძალიან გამახარებს. ყოველთვის ვამბობდი, ჰარლი ქუინი იმ პერსონაჟთაგან ერთ-ერთია, რომლის შესრულებაც დიდი მსახიობიდან დიდ მსახიობზე უნდა გადავიდეს, როგორც ეს მაკბეტის, ბეტმენის და სხვა ცნობილი პერსონაჟების შემთხვევაში ხდება", — განაცხადა მარგო რობიმ MTV-თან ინტერვიუში.

ფოტო: Marvel

გავრცელებული ინფორმაციით, გაგას ჰარლი ქუინი და მარგო რობის ჰარლი ქუინი DC-ის სხვადასხვა სამყაროებში იქნებიან. "ჩემთვის დიდი პატივია ისეთი პერსონაჟისთვის საფუძვლის მომზადება, როგორიც ჰარლი ქუინია, რომელსაც ახლა სხვა მსახიობები განასახიერებენ. ვფიქრობ, რომ ლედი გაგა ამ როლში რაღაც წარმოუდგენელს გააკეთებს", — დასძინა მარგო რობიმ.

შეგახსენებთ, რომ Joker-ის პირველი ნაწილი 2019 წელს გამოვიდა და მაყურებელთა ინტერესი და მოწონება მალევე დაიმსახურა. ფილმმა ოსკარზე 11 ნომინაციიდან ორში გაიმარჯვა. ჯოკერის როლს ხოაკინ ფენიქსი ასრულებს და მეორე ნაწილშიც სწორედ მას ვიხილავთ. Joker: Folie à Deux-ის პრემიერა 2024 წლის 4 ოქტომბერს იგეგმება.