ამის შესახებ შინაგან საქმეთა მინისტრმა, ვახტანგ გომელაურმა განაცხადა.

რატომ არის მნიშვნელოვანი: რუსეთში ნაწილობრივი მობილიზაციის გამოცხადების შემდეგ მოქალაქეების დიდი ნაწილი საქართველოსკენ დაიძრა.

  • ლარსის გამშვები პუნქტიდან ვრცელდება ფოტო და ვიდეომასალა, სადაც ჩანს, რომ რუსეთიდან გადმომსვლელთა რიგი რამდენიმე კილომეტრიანია.

დეტალები: მინისტრის თქმით, დაახლოებით 4-5 დღის წინ 5 00-დან 6 000-მდე ადამიანი იყო შემომსვლელი.

  • ახლა ეს რიცხვი 10 000-მდე გაიზარდა, 40-45%-ით მოიმატა.
  • გომელაურის ცნობით, აქედან დაახლოებით 60% გადის ქვეყნიდან.
  • "რაც შეეხება იმას, რომ 250 000 მოქალაქე შემოვიდა, ეს აბსოლუტურად არასწორია, ტყუილია, მაგდენი არ შემოსულა და საიდან მოგაქვთ ეს ციფრები მე არ ვიცი", — განაცხადა მინისტრმა და აღნიშნა, რომ საზღვრის სხვა გამშვები პუნქტებიდან შემომსვლელთა რაოდენობა გაცილებით ნაკლებია.

გომელაურის თქმით, გაიზარდა საზღვრიდან გაბრუნებულთა რიცხვიც, თუმცა როგორც ჩანს, არა იმიტომ, რომ საქართველოს საზღვრის კვეთა გამკაცრდა.

  • "ლოგიკურია, თუ 100 კაცში 10-ს უკან ვაბრუნებდით, ახლა 1 000 კაცში პირობითად 100 გაბრუნდება უკან, მათემატიკაა ჩვეულებრივი", — განაცხადა მან.
  • მისივე თქმით, ახლა სიტუაცია თითქმის პიკზეა მისული, დგას რიგები და არ აქვს მოლოდინი, რომ ლარსზე შემომსვლელთა რაოდენობა კიდევ უფრო გაიზრდება, მაგრამ ამაზე მეტის გატარებას ვერ შეძლებენ.
  • "ახლაც უკვე გვიჭირს გატარება, მაგრამ გაზრდილი გვაქვს დანაყოფები, რომ მაქსიმალურად გავფილტროთ და ვინმე არ შემოგვეპაროს, უსაფრთხოების სამსახურიც გვეხმარება", — აღნიშნა მან.

არქივიდან: 26 სექტემბერს სოციალურ ქსელში გავრცელდა ფოტო-ვიდეოები, რომლებზეც ჩანს, რომ რუსეთის მხრიდან, ლარსის გამშვებ პუნქტთან რამდენიმე სამხედრო გამოჩნდა.

  • კადრების მიხედვით, საუბარია 10-მდე პირზე, რომლებიც 1 ჯავშანტრანსპორტიორით გადაადგილდებიან.
  • რუსული მედიები თვითმხილველებზე დაყრდნობით წერდნენ, რომ ისინი გამშვებ პუნქტთან ე.წ. ბლოკ-პოსტს აწყობდნენ.
  • თუმცა, FSB-ში განაცხადეს, რომ ჯავშანტრანსპორტიორი საზღვარზე მივიდა წესრიგის დარღვევის თავიდან ასაცილებლად, იმ შემთხვევისთვის, თუ რიგში მდგომი რუსები საზღვრის გარღვევას გადაწყვეტდნენ.