პრემია საბა 2022 დასრულდა. წლის ყველაზე მნიშვნელოვანი ლიტერატურული მოვლენა უკვე მეოცედ ჩატარდა. ჟიურის წევრებმა გამარჯვებულები სხვადასხვა ნომინაციაში გამოავლინეს. მათ შორისაა მწერალი თემო რეხვიაშვილი, რომელმაც წიგნით კურიერის ამბები საუკეთესო ლიტერატურული დებიუტის კატეგორიაში გაიმარჯვა.

თემომ სამადლობელ სიტყვაში გამარჯვება ქვეყანაში არსებული მძიმე სოციალური მდგომარეობის გამო ემიგრაციაში წასულ საკუთარ და სხვის დედებსა და უმუშევრად დარჩენილ მამებს მიუძღვნა. მწერალმა ისიც აღნიშნა, რომ ქვეყნიდან თავადაც მიდის.

"მინდა, ეს ჯილდო სიმბოლურად მივუძღვნა ჩემს მშობლებს, ჩემს ემიგრანტ დედას და სხვა ემიგრანტ დედებს, რომელთა ნაწილი სწორედ ამ და სხვა პრობლემების გამო იმყოფებიან ემიგრაციაში, უმუშევრად დარჩენილ მამაჩემს და სხვა მამებს, რომლებიც ამ ქვეყანაში, სადაც პატიოსანი შრომით ცხოვრება შეუძლებელია, თავიანთ ადგილს ვერ იმკვიდრებენ. რამდენიმე დღეში მეც დავტოვებ ამ ქვეყანას, სადაც მედიკამენტების ხელოვნურად გაბერილი ფასები, ბანკების არანორმალურად მაღალი პროცენტი, შრომის კოდექსის უფუნქციობა და კიდევ მრავალი სხვა რამ გვაწამებს და ამოსუნთქვის საშუალებას არ გვაძლევს საქართველოს მოსახლეობის თითქმის აბსოლუტურ უმრავლესობას. მივდივარ და ვიტოვებ იმედს, რომ ყველაფერი მალე შეიცვლება", — განაცხადა თემო რეხვიაშვილმა.

ამავე თემაზე:

ლიტერატურული პრემია საბა 2022-ის გამარჯვებულთა ვინაობა ცნობილია — ნახეთ სრული სია