საქართველოს პრეზიდენტი გიორგი მარგველაშვილი მიიჩნევს, რომ გენერალურ აუდიტორს, ლაშა თორდიასა და ყოფილ მთავარ პროკურორს, ოთარ ფარცხალაძის კონფლიქტის გარშემო შექმნილი ვითარება საფრთხის შემცველია. ამის შესახებ დღეს გამართულ ბრიფინგზე პრეზიდენტის პრესსპიკერმა, ეკა მიშველაძემ განაცხადა.

"პრეზიდენტის აზრით არსებული არაორდინალური ვითარება საფრთხეს უქმნის აუდიტის სამსახურის ეფექტურ მუშაობას და ზოგადად, კონსტიტუციური ორგანოების ფუნქციონირებას. დღეს არსებული ინფორმაციის საფუძველზე უკვე შეიძლება ითქვას, რომ ეს ინციდენტი ცდება კრიმინალურ შემთხვევას და პოლიტიკური ელფერი შეიძინა. პრეზიდენტი როგორც ქვეყანაში სახელმწიფო ორგანოთა ეფექტურად ფუნქციონირების გარანტი, ყურადღებით აკვირდება პროცესებს და მომავალშიც მიადევნებს თვალს მოვლენათა განვითარებას", - თქვა ეკა მიშველაძემ.

13 მაისს ინფორმაცია გავრცელდა, რომ აუდიტის სამსახურის უფროსს, ლაშა თორდიას ყოფილმა მთავარმა პროკურორმა ფიზიკური შეურაცხყოფა მიაყენა. თორდია თავდასხმას თავისი სამსახურის მიერ ფარცხალაძის შესახებ მასალების მოგროვებას უკავშირებს.

საქართველოს ყოფილი მთავარი პროკურორის, ოთარ ფარცხალაძის ადვოკატის, გაგი მოსიაშვილი თქმით, მისი დაცვის ქვეშ მყოფი პირისა და აუდიტის სამსახურის ხელმძღვანელს შორის ინციდენტი კერძო დაცვის ადეკვატური და პროპორციული ძალის გამოყენებით განეიტრალდა.

შინაგან საქმეთა სამინისტრომ კი 22 მაისს თქვა, რომ პირველმა ხელი თორდიამ მოიქნია. ლაშა თორდია კი საპირისპიროს ამტკიცებს.