თბილისის მეტროპოლიტენის მემანქანეებმა დღეს, 1 მარტს, აქცია გამართეს. ისინი ხელმძღვანელობას აფრთხილებენ, რომ მოთხოვნების დაუკმაყოფილებლობის შემთხვევაში გაიფიცებიან. მათი თქმით ,დღეს შესაბამის უწყებებში განცხადებებს შეიტანენ წინასაგაფიცვო მოქმედებების დაწყების შესახებ.

მეტროპოლიტენის თანამშრომლები სამუშაო პირობების გაუმჯობესებასა და ხელფასის გაზრდას მოითხოვენ. მემანქანეები ასევე ითხოვენ, რომ ღამის საათებში 22:00-დან 06:00-მდე სამუშაო საათები განსხვავებული ტარიფით აუნაზღაურდეთ.

"ჩვენ შეგვაქვს განცხადება წინასაგაფიცო მოქმედებების დაწყებასთან დაკავშირებით, რაც იმას გულისხმობს რომ 21 დღის მერე, უფლებას ვიტოვებთ გავაჩეროთ მეტროპოლიტენი ამ პირობების დაუკმაყოფილებლობის შემთხვევაში"- ამბობს აქციის ერთ-ერთი მონაწილე.

თბილისის მერია მეტროპოლიტენის მემანქანეებისთვის ხელფასების გაზრდას არ გეგმავს. ამის შესახებ თბილისის მერმა დავით ნარმანიამ განაცხადა. მისი თქმით, ხელფასების მომატების რესურსი მერიას არ გააჩნია.

"წელს ჩვენ მნიშვნელოვანი ადმინისტრაციული რესურსების ოპტიმიზაცია გამოვაცხადეთ და ეს ეხება ყველა სამსახურს. შემცირებით არ შეგვიმცირებია, მაგრამ გაზრდის რესურსი წელს არ გვაქვს“, - განაცხადა დავით ნარმანიამ ტელეკომპანია რუსთავი 2-თან ინტერვიუში.

მეტროპოლიტენის თანამშრომლები სამუშაო პირობების გაუმჯობესებასა და ხელფასის გაზრდას მოითხოვენ. მემანქანეები ასევე ითხოვენ რომ ღამის საათებში 22:00-დან 06:00-მდე სამუშაო საათები განსხვავებული ტარიფით აუნაზღაურდეთ.