ფლორიდის შტატში მცხოვრები 51 წლის ქალი პოლიციამ უკვე მეორედ დააკავა, რადგან 911-ზე გაუჩერებლად რეკავდა. ადგილობრივი დეპარტამენტის გამომძიებლების თქმით, ქალმა ბოლო წლის განმავლობაში პოლიციაში 12000-ჯერ დარეკა. მათივე თქმით, ქალის შეჩერებას ყველანაირად ცდილობდნენ, თუმცა ის რეკვას განაგრძობდა.

ოპერატორები ვალდებულები არიან, რომ 911-ზე შემოსულ ყველა ზარს უპასუხონ. 51 წლის ქალს კი, რომელიც დღეში თითქმის 100-ჯერ რეკავდა, პოლიციის მხრიდან დახმარება არ სჭირდებოდა. "ჩვენი ოპერატორები იმ ადამიანების ზარებს პასუხობენ, რომლებიც შეშინებულები არიან და პოლიციის გამოძახება სჭირდებათ. დაკავებული ქალი კი 911-ზე მხოლოდ იმიტომ რეკავდა, რომ პოლიციისთვის შეურაცხყოფა მიეყენებინა", — განაცხადა პოლიციის ოფიცერმა.

51 წლის კარლა ჯეფერსონი 911-ზე შეუჩერებელი რეკვისთვის უკვე მეორედ დააკავეს. სასამართლოს დოკუმენტებში ნათქვამია, რომ ჯეფერსონმა 24 საათის განმავლობაში 512-ჯერ დარეკა და პოლიციელებს აგინა. პოლიციის განცხადებით, ქალი დეპარტამენტის მუშაობას ხელს უშლის, რადგან მთელი დღის განმავლობაში პოლიციის დახმარება უამრავ ადამიანს სჭირდება. "ვფიქრობ, რომ ეს ადამიანი 911-ის სისტემას ბოროტად იყენებს, პრაქტიკაში კი ასეთი შემთხვევა ჯერ არ გვქონია", — დასძინა ოფიცერმა.

დაკავებულ ქალს ბრალი 911-ის სისტემის ბოროტად გამოყენებისა და შეურაცხმყოფელი ზარების განხორციელებისთვის წაუყენეს. ოფიციალური პირები იმედოვნებენ, რომ სასამართლოს შემდეგ ქალი 911-ზე დარეკვას შეწყვეტს.