სუს-ის უფროსის ყოფილი მოადგილე სოსო გოგაშვილი ციხიდან მორიგი წერილით შინაგან საქმეთა მინისტრ ვახტანგ გომელაურს მიმართავს.

რატომ არის მნიშვნელოვანი: დაკავების შემდეგ გოგაშვილმა არაერთი წერილი გაავრცელა, რომლებშიც მმართველი გუნდის სავარაუდო დანაშაულებზე ისაუბრა, მათში ფიგურირებს ვახტანგ გომელაურიც.

  • ადვოკატის თქმით, გომელაურმა გოგაშვილს ციხეში დაურეკა და დაემუქრა.

რას წერს გოგაშვილი: ამბობს, რომ ისაუბრებს იმაზეც, რისი თქმაც გომელაურთან ტელეფონზე საუბრის დროს ვერ მოასწრო.

  • "ეს წერილი არ ითვალისწინებს შეგონებას, რამეთუ ვიცი, რომ "იმის" ბრძანების გარეშე, არაფერს არ იზამ. დროებით "ღირსეულო გენერალო" — ასე მიმართავს ის მინისტრს.
  • შემდეგ კი მოუწოდებს, "ერთხელ მაინც ეყოს გამბედაობა" და საკუთარ საქციელზე აიღოს პასუხისმგებლობა.
  • "ვიცი, რომ წლების მანძილზე პრაქტიკაში კარგად მოირგე შენი გაფუჭებულის სხვაზე გადაბრალება, სხვისი დასჯა და შენი თანამდებობის, ასევე არაოფიციალური კოლოსალური შემოსავლის შენარჩუნება, რომელიც ყოველთვიურად უტოლდება 10 000 რიგითი პოლიციელის შემოსავალს", — წერს ის.

მაჩალიკაშვილის საქმე: გოგაშვილი იხსენებს მაჩალიკაშვილის საქმეს და ამბობს, რომ გომელაურს შეეძლო მის წინააღმდეგ "აგორებული კამპანია გაეჩერებია" და ეთქვა: "შავნაბადას სპეცრაზმი არ ექვემდებარება გოგაშვილს და მათზე ის ვერ გასცემდა ბრძანებას, ეს არის ჩემს დაქვემდებარებაში".

  • გოგაშვილი ამბობს, რომ პასუხისმგებლობის აღების ნაცვლად, გომელაური საიდუმლოდ შეხვდა მედიკო მარგოშვილს და "თავის დაძვრენა განიზრახა".
  • "თქვენ ამ გამწარებულ ოჯახთან გაგზავნეთ ბინძური ადამიანი, რომელსაც უხდით ფულს და დაავალეთ ჩემს წინააღმდეგ მუშაობა, რათა დაეჯერებინა ოჯახი, თითქოსდა ჩემს მიერ ჩადენილ დანაშაულში".
  • ამტკიცებს, რომ პირმა დავალების შესრულების დასტურად ჩანაწერიც გააკეთა, რომელიც მის ხელში აღმოჩნდა.
  • გოგაშვილის თქმით, მტკიცებულებები შეკრიბა და პროკურატურაში საჩივარიც შეიტანა — "ეს მასალები ახლა შენს უწყებაში დევს და შენ მას ცივ ნიავს არ აკარებ".

გოგაშვილის განცხადებით, "ბოლომდე გააგრძელებს ბრძოლას სისტემის დასანგრევად".

  • "როცა ეს მთავრობა აღარ იქნება და სახელმწიფო ინსტიტუტები გათავისუფლდება ოლიგარქის მარწუხებისაგან, დადგება დრო, აგო პასუხი შენს მიერ ჩადენილ დანაშაულებზე", — წერს გოგაშვილი გომელაურს.
  • "თავისუფალ უწყებაში დაგიბარებენ, სუფთად ჩაცმულს, წაგიყენებენ ბრალს და მოგაბრძანებენ მე-12 პენიტენციურ დაწესებულებაში, სადაც ვინტილაცია უკვე გაკეთებული იქნება და დიდხანს ისუნთქებ გრილ და სუფთა ჰაერს", — ამბობს ის.