ქართული ოცნებიდან წასული სოზარ სუბარი განცხადებას ავრცელებს, სადაც წერს, რომ საზოგადოებრივი მოძრაობის მიზანი "საქართველოს ეროვნული ინტერესების დასაცავად საზოგადოების სიმართლით აღჭურვა იქნება".

რატომ არის მნიშვნელოვანი: დეპუტატებმა მოძრაობის შექმნა რამდენიმე დღის წინ დააანონსეს.

  • ახალ განცხადებაში ისინი წერენ, რომ იმ შემთხვევათი, თუ ხელისუფლება "ომთან დაკავშირებულ წნეხს" ვეღარ გაუძლებს, არ გამორიცხავენ მოძრაობა პოლიტიკურ პარტიადაც გარდაქმნან.

დეტალები: წასულების განცხადებით, მხოლოდ "სიმართლით აღჭურვილი ხალხის ძალას" შეუძლია ქართული სახელმწიფოს დაცვა "უმძიმესი ზეწოლისგან", რომელსაც, მათი თქმით, ევროპარლამენტარები, ევროკავშირი, ოპოზიცია და NGO-ები ახდენენ.

  • "ინფორმაციის ნაკლებობის პირობებში, საზოგადოება შეიძლება დარჩეს დაუცველი იმ საფრთხეების წინაშე, რომლებიც საქართველოში მშვიდობას და ქვეყნის დამოუკიდებლობას ემუქრება".
  • "ხალხის ძალა დაფუძნდება როგორც საზოგადოებრივი მოძრაობა, რომელიც პატრიოტული სულისკვეთებით გამსჭვალულ ჩვენს თანამოქალაქეებს, ხალხის მიერ არჩეულ პარლამენტარებს, საკრებულოს წევრებს და საზოგადოების სხვა წარმომადგენლებს გააერთიანებს".

მორიგი ანტიდასავლური გზავნილები: წასულები ქვეყანაში არსებულ პოლიტიკურ პოლარიზაციას "გარედან თავსმოხვეულს" უწოდებენ, რომელიც თითქოს პოლიტიკურ სისტემას გაჯანსაღებისა და სათანადოდ განვითარების შესაძლებლობას არ აძლევს.

  • "2012 წლიდან, ხელისუფლება იძულებული იყო, გარკვეული ანგარიში გაეწია გარე ძალებისთვის, რომლებიც დანაშაულებრივ და თავისი არსით სრულიად ანტიევროპულ პოლიტიკურ პარტიას, ნაციონალურ მოძრაობას ხელოვნურად ასულდგმულებენ".
  • დეპუტატები დასავლელ პარტნიორებს დემოკრატიული სისტემის, სახელმწიფო ინსტიტუტების და სამართლის უზენაესობის "შერყევის არაერთ უხეშ მცდელობაში" ადანაშაულებენ.
  • ანტიდასავლური გზავნილების პარალელურად წასულები ამტკიცებენ, რომ მათი მიზანი არა დასავლურ ინსტიტუტებზე თავდასხმა, არამედ მათი "რეპუტაციის დაცვა და გადარჩენაა".
  • მათი თქმით, საზოგადოებრივი მოძრაობა ყველაფერს გააკეთებს იმისთვის, რომ ხალხს დასავლური ინსტიტუტების მიმართ ნდობა აღუდგინოს, თუმცა საინტერესოა როგორ მოხდება ეს იმ ანტიდასავლური განცხადებებით, რომლებსაც ავრცელებენ.