მას შემდეგ, რაც ტელეკომპანია რუსთავი 2-ის დირექტორმა ნიკა გვარამიამ სააპელაციო სასამართლოს მოსამართლე ნათია გუჯაბიძე, რომელიც რუსთავი 2-ის საქმეს განიხილავს, სახელმწიფოს კუთვნილი თანხების გაფლანგვაში დაადანაშაულა, On.ge დაუკავშირდა იუსტიციის უმაღლესი საბჭოს პრესსამსახურს.

პრესსამსახურის თქმით, მოსამართლის მიმართ დისციპლინური დევნის საქმე კონფიდენციალურია, შესაბამისად, არ შეუძლიათ მოგვაწოდონ ინფორმაცია იმის შესახებ, ნამდვილად იყო თუ არა რუსთავი 2-ის საქმის მოსამართლის მიმართ დისციპლინური დევნა.

მარცხნიდან: ნათია გუჯაბიძე, ნატა ნაზღაიძე, შორენა ყაველაშვილი.

ფოტო: ნიკოლოზ ურუშაძე / რუსთავი 2

რუსთავი 2 -ის გენერალურმა დირექტორმა, ნიკა გვარამიამ დღეს, 1 ივნისს, საგანგებო ბრიფინგზე თქვა, რომ რამდენიმე საათი წინ ტელეკომპანიისთვის კონფიდენციალური წყაროსგან ცნობილი გახდა, რომ რუსთავი 2-ის საქმის ერთ-ერთი მოსამართლე, ნათია გუჯაბიძე თაღლითობაშია შემჩნეული და მის მიმართ პროკურატურა სწორედ ამ ბერკეტის გამოყენებით ახდენს ზეწოლას:

"საქმე იმაშია, რომ 2014 წელს მას სახელმწიფომ გამოუყო სახსრები იმიტომ, რომ მან განაცხადა, არ ჰქონდა საცხოვრებელი სახლი თბილისში და სამოსამართლეო უფლება-მოსილების განხორციელებისთვის სჭირდებოდა ანაზღაურება, რაც მიღებული პრაქტიკაა. აღმოჩნდა, რომ მას ეს სახლი ჰქონდა და ბინას ქირაობდა საკუთარი დედისგან, შესაბამისად ის ითვისებდა აღნიშნულ თანხებს უკანონოდ".

გვარამიას მტკიცებით, გუჯაბიძის საქმე პროკურატურაში იუსტიციის უმაღლესმა საბჭომ არ გააგზავნა და სწორედ ამ საქმეს იყენებენ მასზე ზეწოლის მოსახდენად, რათა რუსთავი 2-ის საქმეზე ხელისუფლებისთვის სასურველი შედეგი დადგეს სააპელაციო სასამართლოში.