ადგილობრივი მედიის ინფორმაციით, ე.წ. პარლამენტის კომიტეტის სხდომაზე განიხილეს "კანონის პროექტი" დე ფაქტო რესპუბლიკასა და რუსეთს შორის "შეთანხმების რატიფიცირებაზე", რომელიც აფხაზეთში არსებული რამდენიმე ობიექტის ოკუპანტი ქვეყნისთვის გადაცემას გულისხმობს.

რატომ არის მნიშვნელოვანი: ამ "შეთანხმებით" საქართველოს ოკუპირებული რეგიონის ტერიტორიის ნაწილი რუსეთს გადაეცემა, რაც ქვეყნის ინტერესებს აზარალებს.

  • ამასთან, ბიჭვინთის მოსახლეობა შეშფოთებულია ფაქტით, თუმცა ე.წ. პრემიერმინისტრი გადაწყვეტილებას იმით ამართლებს, რომ "შეთანხმება აფხაზეთის ინტერესებს აკმაყოფილებს".

დეტალები: განხილვაში მონაწილეობას იღებდნენ ოკუპირებული აფხაზეთის დე ფაქტო პრემიერმინისტრი და ვიცე-პრეზიდენტი, ბიჭვინთის ე.წ. საქალაქო კომიტეტის და საკრებულოს წარმომადგენლები და სხვა.

  • ე.წ. შეთანხმება, რომელსაც მოსკოვში 2022 წლის 19 იანვარს მოეწერა ხელი, გულისხმობს რუსეთის ფედერაციისთვის "სახელმწიფო აგარაკების" კომპლექსის უსასყიდლოდ გადაცემას.
  • ასევე, მიწებისა და საზღვაო აკვატორიის ნაწილის იჯარით გაცემას.
  • რუსეთს ეძლევა უფლება უსასყიდლოდ გამოიყენოს "სახელმწიფო აგარაკები # 8; 9; 10".
  • საბოლოოდ, კომიტეტის წარმომადგენლებმა გადაწყვიტეს მისცენ რეკომენდაცია დე ფაქტო პარლამენტს, რომ მიიღონ ეს "კანონი".

სტრიქონებს შორის: დასავლეთის მხრიდან დაწესებული სანქციები რუსეთის ოლიგარქთა დიდ წრეს შეეხო, რის შედეგადაც, მათ ევროპის კურორტებზე დასვენება აღარ შეუძლიათ, ბიჭვინთის ტერიტორია კი სწორედ ამ მიზნით, შეიძლება, იყოს გამოყენებული.