ინგა გრიგოლიას გადაცემაში სტუმრობისას, გირჩის ლიდერმა ზურაბ ჯაფარიძემ განაცხადა, რომ არჩევნების წინ მნიშვნელოვანია ყველა პარტიამ წარუდგინოს საზოგადოებას თავისი ეკონომიკური პროგრამა, რათა მოქალაქეები არჩევნებზე მისვლისას ინფორმირებულნი იყვნენ როგორ მომავალს უჭერენ მხარს.

ჯაფარიძემ ასევე თქვა, რომ ნაციონალურ მოძრაობაში ყოფნისას, მან დაწერა 36 პუნქტიანი პროგრამა, ანტიკრიზისული გეგმა და მათი ბოლო ეკონომიკური პროგრამის ნაწილი:

"ჩემი და ვახო მეგრელიშვილის დაწერილია მათი ბოლო პროგრამის 80-90 პროცენტი".

ზურაბ ჯაფარიძემ აღნიშნა, რომ მისთვის და გირჩისთვის მნიშვნელოვანია ქართული ოცნებისა და ნაციონალური მოძრაობის ეკონომიკურ პროგრამის წარმომადგენლები მასთან დებატებზე დასხდნენ:

"ნაციონალური მოძრაობიდან ჩემთან დებატებზე შეუძლია დაჯდეს ბატონ რომან გოცირიძეს, ხოლო ოცნებიდან ნოდარ ხადურსა და დიმიტრი ქუმსიშვილს".

გირჩის ლიდერის თქმით, ქართული ოცნებისა და ნაციონალური მოძრაობის ლიდერებს ეკონომიკურ თემაზე დებატები არ აწყობთ, რადგან მათი სტრატეგია ერთმანეთის ლანძღვას უკავშირდება:

"ისინი საკუთარ უპირატესობას ერთმანეთის ლანძღვით ამტკიცებენ, მათ უბრალოდ ეშინიათ ამ [ეკონომიკურ] საკითხზე დებატის, პირდაპირ ვიტყვი რომ ეშინიათ გირჩთან დებატის, ზუსტად იციან რომ ჩვენ მოვიგებთ ყველა დებატს და გავაცამტვერებთ მათ ყველა ერთმანეთის საწინააღმდეგო არგუმენტს".

ჯაფარიძის თქმით, გირჩი ერთადერთი პარტიაა, რომელსაც ამ ქვეყნის გასავითარებლად სწორი ხედვა აქვს არჩეული, ნაციონალური მოძრაობისა და ქართული ოცნების სტრატეგიის ნაწილი კი არის არჩევნების წინ ოფშორებიდან მილიონების დახარჯვა, რათა "გაჭირვებული ამომრჩეველი მოისყიდონ".