საქართველოს პროკურატურა აცხადებს, რომ განაჩენს, რომლის თანახმადაც, სამი პირი ნაწილობრივ გამართლდა, არ ეთანხმება.

რატომ არის მნიშვნელოვანი: უწყების ცნობით, სასამართლომ ბრალდებულები სისხლის სამართლის კოდექსის 225-ე მუხლის მეორე ნაწილისა და 156-ე მუხლის მე-2 ნაწილის "ა" ქვეპუნქტით წარდგენილ ბრალდებაში გაამართლა.

  • პირველი ბრალდება ჯგუფურ ძალადობაში მონაწილეობას გულისხმობდა;
  • მეორე ბრალდება კი საზოგადოებრივ მოღვაწეობასთან დაკავშირებით ძალადობრივად ადამიანის დევნას.

დეტალები: საქალაქო სასამართლომ ბრალდებულები დამნაშავედ 160-ე მუხლის მეორე ნაწილის "ა" და მესამე ნაწილის "ა" ქვეპუნქტებში ცნო.

  • ეს მფლობელობაში მფლობელის ნების საწინააღმდეგოდ უკანონოდ შესვლას გულისხმობს, რაც ჩადენილია ჯგუფურად ძალადობითა და ძალადობის მუქარით;
  • სასამართლომ ბრალდებულები 5 000 ლარით დააჯარიმა.

პროკურატურის თქმით, ბრალდებულები 5 ივლისს ორგანიზებულ ძალადობაში მონაწილე სხვა პირებთან ერთად, ჯგუფურად, შეუწყნარებლობის მოტივით თავს დაესხნენ თბილისი პრაიდის ოფისს.

  • "სიტყვისა და აზრის გამოხატვის, ასევე, მათი საზოგადოებრივი მოღვაწეობის შეზღუდვის მიზნით, უკანონოდ შეიჭრნენ ოფისში";
  • "დემონსტრაციულად დააზიანეს და გაანადგურეს თბილისი პრაიდის კუთვნილი ინვენტარი".