იმის მიუხედავად, რომ ქართული ოცნების დეპუტატი, დიმიტრი სამხარაძე საკუთარ საქციელს არ ნანობს და თქვა, რომ ადრესატს გაცილებით მეტი ეკუთვნის, ირაკლი კობახიძე ირწმუნება, რომ სამხარაძემ საზოგადოების წინაშე ბოდიში მოიხადა და ამით "ყველაფერი ნათქვამია".

რატომ არის მნიშვნელოვანი: როგორც ჩანს, პარტიის თავმჯდომარისთვის შემაშფოთებელი არაა, რომ მისი თანაგუნდელი სპეცრაზმით გარშემორტყმული ოფისის აივნიდან და ეზოდან მოქალაქეებს აგინებს და იმუქრება.

  • ეს პირველი შემთხვევა არ არის, როდესაც სამხარაძე აგრესიული რიტორიკით და შეურაცხმყოფელი ლექსიკით მოიხსენიებს აქციის მონაწილეებს, აქტივისტებს ან ოპოზიციას.
  • ასევე, ეს პირველი შემთხვევა არ არის, როდესაც მმართველი გუნდის დეპუტატები აგრესიას იჩენენ მათ მიმართ, ვისაც განსხვავებული აზრი აქვს და საკუთარი თანაგუნდელების ქცევას ამართლებენ.
  • ერთმანეთის გამართლების მცდელობებში ქართული ოცნების წევრები არ გმობენ ძალადობას და სიძულვილის რიტორიკას, რაც დაუსჯელობის სინდრომს ქმნის.

რა თქვა კობახიძემ: მმართველი პარტიის თავმჯდომარე ირწმუნება, რომ მათი დამოკიდებულება გამოხატვის ფორმების მიმართ ცნობილია, თუმცა არ აკონკრეტებს რას გულისხმობს.

  • "რაც შეეხება უხამსი სიტყვების გამოყენებას, უხამსობას, მათ შორის ტელეეთერებში ბილწსიტყვაობა, ეს არის ამ პოლიტიკური ძალის, ვგულისხმობ ნაცმოძრაობას და მისი მედიასაშუალებების ერთ-ერთი მთავარი პიარული ხაზი".
  • "ჩვენ ამ ხაზს ყოველთვის ვაპროტესტებდით წლების განმავლობაში, განსაკუთრებით 2018 წლის შემდეგ, თუმცა ამ პროტესტს არავითარი რეაგირება არ მოჰყოლია".
  • "ზოგადად, ნებისმიერი უხამსობა, ბილწსიტყვაობა, მითუმეტეს ამის ჩვეულებრივ მოვლენად ქცევა, ეს არის, რა თქმა უნდა, ქვეყნის საწინააღმდეგოდ მიმართული მოვლენა და ამას აკეთებთ თქვენ, ამას აკეთებს თქვენი პარტია და ამას აკეთებენ თქვენი ტელევიზიები".

რა მოხდა: 3 ივლისს სამხარაძე ოფისიდან გამოვიდა და რამდენჯერმე შეიგინა. ამ დროს ქართული ოცნების ოფისი პოლიციის და სპეცდანიშნულების რაზმებით იყო გარშემორტყმული.

  • გინების შემდეგ სამხარაძე რამდენიმე პირმა უკან შეაბრუნა.
  • მანამდე სამხარაძემ ფეისბუქზე დაპოსტა: "10 კაცი ვართ ოფისში! გელოდებით დორბლიან მონებს".
  • მოგვიანებით კი თავადვე გაავრცელა ვიდეო, სადაც ჩანდა, რომ აქციის მონაწილეებს აივნიდან აგინა.