ნაცისტების მოწყობილი საკონცენტრაციო ბანაკის ყოფილ მცველს გერმანულმა სასამართლომ 101 წლის ასაკში განაჩენი გამოუტანა. იოზეფ შუცს ჰოლოკოსტის დროს 3 518 ადამიანის მკვლელობაში მონაწილეობა ედება ბრალად.

ნაცისტური რეჟიმის მხარდამჭერს გასულ წელს წაუყენეს ბრალი ზაქსენჰაუზენის საკონცენტრაციო ბანაკის ტყვეების დახოცვაში "გამიზნული და გააზრებული" ხელშეწყობისთვის. საბოლოოდ, ნოირუპინის რეგიონულმა სასამართლომ შუცს სასჯელი 28 ივნისს გამოუტანა.

მკვლელობაში ბრალდებულებს გერმანიაში, როგორც წესი, 3-დან 15 წლამდე პატიმრობას უსჯიან, თუმცა, სასამართლო პროცესი ბევრ გარემოებას ემყარებოდა — მათ შორის იმას, რომ დანაშაულებები დიდი ხნის წინ მოხდა, განსასჯელის სკამზე მჯდომი კი უკვე ძალიან მოხუცი იყო.

"განაჩენი დაგვიანებული კომპენსაციაა [დაღუპულების] ახლობლებლისთვის და ძალიან მნიშვნელოვანი განცხადება გერმანიისგან", — ამბობს აუშვიცის საერთაშორისო კომიტეტის წარმომადგენელი ქრისტოფ ჰოიბნერი.

ჰოიბნერმა, რომელიც პროცესებსაც ესწრებოდა, გერმანიის სასამართლო ბრალის წაყენების დაგვიანებისთვის გააკრიტიკა. მისივე თქმით, ბრალდებული საკონცენტრაციო ბანაკის მუშაობაში აქტიურ მონაწილეობას ყოველთვის უარყოფდა.

სასამართლოს გადაწყვეტილებას დადებითად გამოეხმაურა გერმანიაში მოქმედი ებრაელთა ცენტრალური საბჭო.

"იმის მიუხედავად, რომ ბრალდებული, მისი ასაკის გამო, მისჯილ დროს ალბათ არ გაატარებს საპატიმროში, განაჩენი მისასალმებელია", — აცხადებს საბჭოს პრეზიდენტი, იოზეფ შუსტერი, — "ათასობით ადამიანი, რომელიც საკონცენტრაციო ბანაკებში მუშაობდა, სიკვდილის მანქანის მოქმედებას უწყობდა ხელს. ისინი ამ სისტემის ნაწილი იყვნენ, ამიტომ, პასუხისმგებლობა მათაც ეკისრებათ. სამწუხაროა, რომ ბრალდებული თავის მონაწილეობას ბოლომდე უარყოფდა და სინანულს საერთოდ არ გრძნობდა".

ნაცისტების საკონცენტრაციო ბანაკის ყოფილი მცველი, 101 წლის იოზეფ შუცი, სასამართლო პროცესზე მიმავალი სახეს იფარავს.

ფოტო: AFP

სასამართლოზე ცნობილი გახდა დანაშაულებები, რომელში მონაწილეობაც შუცს ბრალად ედება. ესაა საბჭოთა სამხედრო ტყვეების დახვრეტაში მონაწილეობა, ასევე აუტანელი პირობებით, მომწავლელი გაზით ან პირდაპირ სროლით ბანაკის ტყვეთა დახოცვის ხელშეწყობა.

ზაქსენჰაუზენის საკონცენტრაციო ბანაკი ტყვეების მიერ აშენდა 1936 წელს. მასში 200 ათასამდე ადამიანი მოხვდა, რომელთა, დაახლოებით, ნახევარი იქვე დაიღუპა.

ნაცისტების მოწყობილმა საკონცენტრაციო და სიკვდილის ბანაკებმა ჯამში 6 მილიონამდე ებრაელის სიცოცხლე შეიწირა. ჰიტლერის რეჟიმმა ასევე დახოცა ათასობით რომა (ბოშა), პოლიტიკური მოწინააღმდეგე, სექსუალური და რელიგიური უმცირესობის წევრი და შშმ პირი.

ასევე იხილეთ: