Tbilisi Pride-მა პრაიდის კვირეულთან დაკავშირებით განცხადება გაავრცელა. ისინი ამბობენ, რომ ღირსების მარში არ ჩატარდება, ყველა სხვა დაგეგმილი ღონისძიება კი გაიმართება დახურულ სივრცეში, თუმცა განცხადებაში აღნიშნულია, რომ პრორუსული და ძალადობრივი ალტ ინფო იმეორებს მუქარებს.

რატომ არის მნიშვნელოვანი: საქართველოში პრაიდის ღონისძიებების ფონზე პრორუსული ჰომოფობიური ჯგუფები იკრიბებიან და ცდილობენ მათი გამოხატვის თავისუფლება შეზღუდონ.

  • 2021 წელს მათ რუსთაველის გამზირზე, სადაც ღირსების მარში იყო დაგეგმილი, 50-ზე მეტ ჟუნრალისტზე იძალადეს.
  • 5 ივლისს ნაცემი ოპერატორი ლექსო ლაშქარავა გარდაიცვალა.

დეტალები: ორგანიზაცია აცხადებს, რომ ორი თვეა აქტიურ კოორდინაციაშია შსს-სთან, აწვდიან ზუსტ, დეტალურ ინფორმაციას ღონისძიებებზე და ასევე, გაჟღერებულ მუქარებზე.

  • მათივე თქმით, უწყებასთან შეხვედრები საერთაშორისო ორგანიზაციების, დიპლომატიური კორპუსისა და სახალხო დამცველის ოფისის მონაწილეობით იმართება.
  • პრაიდის ცნობით, შსს მათ ღონისძიებების დაცვის გარანტიებს აძლევს და ამაზე უახლოეს მომავალში თავადაც გააკეთებენ განცხადებას.

ორგანიზაცია ხაზს უსვამს იმას, რომ პრემიერმინისტრი ანტისახელმწიფოებრივ საქმიანობაში სდებს მათ ბრალს და მათ პოლიტიკურ პარტიებთან დაკავშირებას ცდილობს.

  • ამასთან, ირაკლი კობახიძე 5 ივლისის მოვლენების ორგანიზებაში ალტ ინფოს ლიდერების ბრალს ვერ ხედავს, რითაც ქმნის დაუსჯელობის სინდრომს და სტიმულს აძლევს წლევანდელ, იდენტურ მუქარებს.

Tbilisi Pride ითხოვს, მთავრობამ საჯაროდ და მკაფიოდ განაცხადოს, რომ დაიცავს კვირეულის ღონისძიებებს, თითოეული მონაწილის უსაფრთხოებას.

  • უზრუნველყონ საზოგადოებრივი წესრიგის დაცვა ღონისძიებების მიმდებარე ტერიტორიებზე და მთელ ქალაქში.
  • დასაჯონ 5 ივლისის ორგანიზატორები, რომლებიც წელსაც ღიად აგრძელებენ ძალადობრივ საქმიანობას.