თბილისში ადგილობრივ საქალაქო რეგულარულ მარშრუტებზე მოძრავი არც ერთი მიკროავტობუსი (M2 კატეგორია) გაზზე აღარ მუშაობს. ინფორმაციას თბილისის მერიის ტრანსპორტის საქალაქო სამსახური ავრცელებს:

"გაზის აპარატურით აღჭურვილი ყველა, 101-ვე მიკროავტობუსი, კვლავ დიზელის საწვავზეა გადაყვანილი".

თბილისის მერიის ტრანსპორტის საქალაქო სამსახური აცხადებს, რომ აღნიშნულს მათ მიერ ჩატარებული მონიტორინგი ადასტურებს.

2015 წლის გაზაფხულიდან მერიას ნებართვის მფლობელ კომპანიებთან სასამართლო დავა ჰქონდა. მგზავრთა უსაფრთხოებიდან გამომდინარე ტრანსპორტის სამსახური საქართველოს მთავრობის რეგლამენტის დარღვევით აღჭურვილი გაზის აპარატურის დემონტაჟს მოითხოვდა. საბოლოოდ, საქალაქო სასამართლომ მერიის პოზიცია გაიზიარა, რის შემდეგაც კომპანიებმა სასამართლოს გადაწყვეტილება აღასრულეს.

სულ დედაქალაქში საშუალოდ 1 800 ყვითელი მიკროავტობუსი მოძრაობს.