ნატოს გენერალურმა მდივანმა, იენს სტოლტენბერგმა, განაცხადა, რომ ჩრდილოატლანტიკური ალიანსი ავღანეთში ჯარისკაცების დამატებითი ნაკადის გაგზავნას უახლოეს მომავალში განიხილავს. ინფორმაციას როიტერსი ავრცელებს.

მისი თქმით, ავღანეთში ვითარება მძიმდება, თალიბანის მებრძოლები ტერიტორიების დატაცებას ცდილობენ, ამიტომ აუცილებელია ქვეყანაში რამდენიმე ათასი ჯარისკაცის დამატებით გაგზავნა.

"ამ მოთხოვნას განვიხილავთ და უახლოეს მომავალში მივიღებთ გადაწყვეტილებას" - განაცხადა სტოლტენბერგმა ბრიტანეთის პრემიერმინისტრ ტერეზა მეისთან, შეხვედრის შემდეგ.

ნატოს ჯარები ავღანეთში მშვიდობიანი მისიით არიან და საწვრთნელ ტრენინგებსაც ატარებენ:

"მე მჯერა, რომ ტერორიზმის წინააღმდეგ ყველაზე ძლიერი ძალა და საუკეთესო პასუხი ადგილობრივი სამხედროების გაწრთვნა და მათი დახმარებაა, საკუთარი ქვეყნის დასაცავად".

ნატოს ამ დროისთვის ავღანეთში 13 450-მდე ჯარისკაცი ჰყავს, მათ შორის 6 900 ამერიკელი სამხედროა.