საქართველოს პრეზიდენტმა და ეროვნული უშიშროების საბჭოს მდივანმა დღეს, საკონსტიტუციო ცვლილებებთან დაკავშირებით, უსაფრთხოების საკითხებზე სასაუბროდ, დიპლომატები, საკანონმდებლო, აღმასრულებელი და არასამთავრობო ორგანიზაციების წარმომადგენლები მიიღეს.

მარგველაშვილმა ახალი საკონსტიტუციო რეფორმის შედეგად გაუქმებულ უშიშროების საბჭოს მნიშვნელობაზე ისაუბრა:

"რეალურად ის ორგანო, რომელიც უნდა უზრუნველყოფდეს, როგორც ჯარის, შეიარაღებული ძალების გაძლიერებას, ასევე სერიოზული გამოწვევების მიმართ მზადყოფნას, ფაქტობრივად გამქრალია კონსტიტუციიდან და ჩანაცვლებულია, ერთის მხრივ თავდაცვის საბჭოთი,რომელიც მხოლოდ ომიანობის დროს ფუნქციონირებს, ხოლო მეორე მხრივ ლოზუნგით - საქართველო ნატოს წევრი ქვეყანა უნდა გახდეს".

საქართველოს პრეზიდენტის განცხადებით, საკონსტიტუციო პროექტში ამ ცვლილებების შეტანით გამოიხატება უსაფრთხოების საკითხების მიმართ არაადეკვატური დამოკიდებულება.

პრეზიდენტმა საკონსტიტუციო ცვლილებები, უმაღლესი მთავარსარდლის ფუნქციების შემცირების ნაწილშიც გააკრიტიკა და აღნიშნა, რომ მთავარსარდლის ფუნქციები პრეზიდენტს მხოლოდ ფორმალურად აქვს დატოვებული.