ქვემო ქართლში დააკავეს 1981 წელს დაბადებული კაცი, რომელიც თავის არასწულწლოვან შვილს ქორწინებას აიძულებდა.

რატომ არის მნიშვნელოვანი: იძულებით ქორწინება სისხლის სამართლებრივი დანაშაულია. არასამთავრობო ორგანიზაციები აცხადებენ, რომ ის ადამიანის უფლებათა უხეში დარღვევაა.

  • 2020 წლის კვლევაში საია მიუთითებდა, რომ ქორწინების იძულების მსხვერპლები საქართველოში ქალები არიან და სახელმწიფოს ნაადრევი და იძულებითი ქორწინების პრევენციაზე მუშაობის გაძლიერებისკენ მოუწოდებდა.
  • "ადრეულ ასაკში დაქორწინებული გოგოები რჩებიან განათლების, დასაქმების პერსპექტივისა და სოციალური კავშირების გარეშე", — ნათქვამია UNICEF-ის 2018 წლის კვლევაში.

დეტალები: გამოძიებით დადგინდა, რომ ბრალდებული 2004 წელს დაბადებულ შვილს ქორწინებას ფსიქოლოგიური ზემოქმედების გზით აიძულებდა.

  • არასრულწლოვანმა ამის შესახებ პოლიციას თავად აცნობა — ის თავშესაფარშია გადაყვანილი, ოჯახის სხვა წევრების მიმართ კი შემაკავებელი ორდერებია გაცემული.
  • გამოძიება სსკ-ის 111 150-ე პრიმა მუხლის მე-2 ნაწილის ა ქვეპუნქტით მიმდინარეობს — დანაშაული 2-დან 4 წლამდე თავისუფლების აღკვეთას ითვალისწინებს.