ქართული ავიაკომპანია ჯორჯიან ეარვეიზი, იგივე აირზენა, რუსული და თურქული ავიაკომპანიების შემდეგ, უნგრული დაბალბიუჯეტიანი ავიაკომპანია WizzAir-ის დაბალი ფასებით არის უკმაყოფილო. აირზენას გენერალურმა დირექტორმა, გივი დავითაშვილმა ამის შესახებ ტელეკომპანია პირველის ეთერში, გადაცემაში "საქმის კურსი" ისაუბრა.

გივი დავითაშვილის თქმით, რუსული და თურქული ავიაკომპანიები ქართულ ბაზარზე დემპინგური ფასებით ყიდიან ავიაბილეთებს, რის გამოც მათთან კონკურენცია აირზენასთვის რთულია:

"საკუთარ სახელმწიფოში რუსულ ავიაკომპანიებს აქვთ 3-4-ჯერ უფრო დაბალი ნავიგაციისა და აეროპორტების ტარიფები, ვიდრე სხვა, ამ შემთხვევაში ქართულ ავიაკომპანიებს. ეს იმის წინაპირობაა, რომ დემპინგური ფასებით განახორციელონ ოპერირება და მათ მიერ შესრულებული რეისის თვითღირებულება ორჯერ უფრო ნაკლებია, ვიდრე ჯორჯიან ეარვეიზის მიერ შესრულებული ავიარეისის. არ შეგვიძლია თვითღირებულებაზე დაბალი ფასით მოვახდინოთ ოპერირება, როდესაც რუსულ ავიაკომპანიებს ამის მეტი რესურსი აქვთ. ან მათ მიმართ უნდა გატარდეს რამე სანქციები, ან ქართულ კომპანიასაც უნდა ჰქონდეს მსგავსი მხარდაჭერა, რომ კონკურენცია ჯანსაღი და სამართლიანი იყოს."

როგორც დავითაშვილი ამბობს, მათ იგივე პრეტენზიები აქვთ როგორც თურქულ კომპანიებთან, ისე უნგრულ ავიაკომპანია WizzAir-თან დაკავშირებითაც, რომელიც ქუთაისიდან ევროპის მიმართულებით დაფრინავს:

"ვიზეართან დაკავშირებითაც გვაქვს იგივე პრობლემა, რადგან ქართული სახელმწიფოც ეხმარება ვიზეარს გარდა იმისა, რომ გარკვეული პრივილეგიებით სარგებლობენ საკუთარ ქვეყანაში".

WizzAir დაბალბიუჯეტიანი უნგრული ავიაკომპანიაა, რომელიც ცნობილი და პოპულარული სწორედ თავისი საფასო პოლიტიკის გამო გახდა. აღნიშნული ავიაკომპანიით ქუთაისიდან ევროპის მიმართულებით გადაადგილება, თბილისიდან სხვა ავიაკომპანიების მიერ შესრულებული რეისებისგან განსხვავებით, რამდენჯერმე ნაკლებ ფასად არის შესაძლებელი.