ლეგენდარული ბრიტანული როკჯგუფი Queen თავისი პირვანდელი სოლისტის, ფრედი მერკურის შესრულებით ახალ სიმღერას გამოუშვებს.

ბენდის წევრები — ბრაიან მეი და როჯერ ტეილორი — აცხადებენ, რომ აქამდე უცნობი სიმღერა იპოვეს, რომელიც მანამდე ჩაიწერა, სანამ მერკური 1991 წელს, 45 წლის ასაკში გარდაიცვლებოდა.

"ფრედის დატოვებულ სიმღერას მივაგენით, რომელიც დავიწყებული გვქონდა", — ჰყვება 72 წლის ტეილორი, — "ეს შესანიშნავი სიმღერაა; ნამდვილი აღმოჩენა".

მუსიკოსი დასძენს, რომ ჯგუფის ფანები ამ კომპოზიციას, რომელიც 1989 წელს გამოსული ალბომის, The Miracle-ისთვის იყო განკუთვნილი, სავარაუდოდ, სექტემბერში მოისმენენ. თუმცა, ჯერჯერობით უცნობია მისი სახელწოდება.

ფოტო: Getty Images

Queen-ს ფრედი მერკურის ჩანაწერები მისი სიკვდილის შემდეგ წინათაც გამოუშვია. 2014 წელს გამოსულ კრებულში Queen Forever მანამდე უცნობი სამი სიმღერა შევიდა — მათ შორის ერთ-ერთის ჩაწერაში მაიკლ ჯექსონიც მონაწილეობდა.

მერკურის გარდაცვალებამდე ჩაწერილ სიმღერებს ჯგუფმა 1995 წელს გამოსულ მე-15 და ბოლო სტუდიურ ალბომშიც, Made in Heaven, მოუყარა თავი.