"გემრიელია და წერტილი" (Вкусно и точка) — ასე ჰქვია რესტორნების ახალ ქსელს, რომლითაც რუსეთის მოქალაქეებმა McDonald's-ის დავიწყება უნდა მოახერხონ. რამდენიმე თვის წინ, უკრაინაში შეჭრის გამო მაკდონალდსმა რუსეთის ბაზარი დატოვა.

ფოტო: Evgenia Novozhenina

"სახელი იცვლება, სიყვარული რჩება", — ესაა ახალი ქსელის სლოგანი. "გემრიელია და წერტილის" პირველმა 15-მა რესტორანმა მუშაობა 12 ივნისს დაიწყო. კომპანიის ხელმძღვანელის, ოლეგ პაროევის თქმით, ივნისის ბოლომდე 200, ზაფხულის ბოლომდე კი 850 რესტორნის გახსნა იგეგმება. ახლადგახსნილი რესტორნების წინ რიგი იმაზე პატარა იყო, ვიდრე 1990 წელს მოსკოვში გახსნილი მაკდონალდსის პირველი რესტორნის წინ.

როგორც რესტორნის წარმომადგენლები აცხადებენ, კვლავ მაკდონალდსის დანადგარებს იყენებენ და საჭმლის ხარისხი და ხელმისაწვდომი ფასებიც არ შეიცვლება. პაროევის თქმით, ინტერიერიც იგივე დარჩება, თუმცა მაკდონალდსის ლოგო, სლოგანი თუ ბრენდზე მიმანიშნებელი სხვა ნებისმიერი სიმბოლო გადაკეთდება.

რესტორნის წარმომადგენლების თქმით, "გემრიელია და წერტილი" კოკა-კოლის ჩასანაცვლებლად ახალ სასმელსაც ეძებს. კოკა-კოლამ მაკდონალდსის მსგავსად რუსეთის ბაზარი თვეების წინ დატოვა.

ამავე თემაზე: