თბილისის მუნიციპალიტეტის საკრებულომ 8 მაისს დადგენილება მიიღო, რომლითაც უნებართვო გარევაჭრობის შედეგად ჩამორთმეული ნივთების განკარგვის წესი დამტკიცდა.

დადგენილების პროექტის მიხედვით, გარევაჭრობის დროს ჩამორთმეული ქონება თბილისის მუნიციპალიტეტის საკუთრება ხდება და მისი განკარგვის წესიდან გამომდინარე, სოციალურად დაუცველებს, მზრუნველობამოკლებულებს, თავშესაფარში მცხოვრებს, ან სხვა გარემოების გამო სპეციალური საჭიროებების მქონე პირებისთვის გამოიყენება. გარდა ამისა, ის ქონება, რომელიც არ ექვემდებარება გადაცემას ან ვერ გამოვლინდა ქონების მიმღები პირი, უნდა განიკარგოს ან განადგურდეს კანონის შესაბამისად.

ფოტო: თბილისის საკრებულო/On.ge

დადგენილება ძალაში გამოქვეყნებისთანავე შედის. ის ამ დრომდე არ გამოქვეყნებულა.

თბილისის მერიის შესაბამისმა სამსახურმა ქუჩებიდან გარემოვაჭრეების აყრა მიმდინარე წლის მარტიდან დაიწყო.