შინაგან საქმეთა სამინისტროს განცხადებით, მაისის თვეში, 8 დღის განმავლობაში, საქართველოში შემოსვლაზე უარი ეთქვა ღამის მგლების ჯგუფის 100-ზე მეტ წევრს. ამის შესახებ შსს-ს პრესსამსახური ავრცელებს ინფორმაციას.

უწყების განცხადებით, სხვადასხვა დროს, საქართველოში, ლეგალური დოკუმენტაციითა და ყოველგვარი ამოსაცნობი ატრიბუტიკის გარეშე, შემოვიდა რამდენიმე ერთეული, დაახლოებით, 2-3 ბაიკერი:

"საზღვარზე ამ ადამიანებს ღამის მგლების არანაირი ატრიბუტიკა არ გააჩნდათ. შსს-ს მოქმედებების შედეგად, რუსი ბაიკერების - ღამის მგლების ჯგუფმა ვერ შეძლო თბილისში მასშტაბური პერფორმანსის გამართვა. უწყება მომავალშიც არ მიესალმება მსგავსი ჯგუფების საქართველოში ვიზიტს".

მოტოციკლისტების დაჯგუფება ღამის მგლების ორი წევრი მივიდა დღეს ვაკის პარკში, სადაც მეორე მსოფლიო ომის მონაწილეები არიან შეკრებილნი და აღნიშნავენ ფაშიზმზე გამარჯვების დღეს.

ღამის მგლების ლიდერი, რუსეთის პრეზიდენტ პუტინის მეგობარი, ალექსანდრე ზალდოსტანოვი, მეტსახელად „ქირურგი“, რუსულ-ქართული ახალგაზრდული კავშირის ორგანიზებით 9 მაისს თბილისში, დაჯგუფების სხვა წევრებთან ერთად ორგანიზებულად აპირებდა ჩამოსვლას.