თბილისის მერის, კახა კალაძის თქმით, საქართველოში პოლიტპატიმრები არ არსებობს და ეს დრო წარსულ ჩააბარეს.

"პოლიტპატიმრები საქართველოში არ არსებობს, ეს დრო ჩვენ წარსულს ჩავაბარეთ", — ამბობს ის.

კითხვაზე, თუ როგორ შეაფასებდა სახალხო დამცველის ინიციატივას, კალაძე პასუხობს, რომ ეს ნინო ლომჯარიას გადაწყვეტილებაა და ნიკა გვარამიას გარდა უამრავი პატიმარი ჰყავს საქართველოს.

სახალხო დამცველმა, ნინო ლომჯარიამ განაცხადა, რომ მთავარი არხის დირექტორის, ნიკა გვარამიას საქმის განაჩენი წარმოადგენს კონსტიტუციით, ეროვნული და საერთაშორისო კანონმდებლობით განმტკიცებული კანონიერების პრინციპისა და დასაბუთებულობის სტანდარტის უხეშ დარღვევას, ამიტომ ომბუდსმენი მიმართავს პრეზიდენტს, გამოიყენოს მის ხელთ არსებული შეწყალების უფლებამოსილება.

საქართველოში პოლიტპატიმრებისა და პოლიტიკური მართლმსაჯულების საკითხი ოპოზიციის, ასევე, არასამთავრობო ორგანიზაციებისა და საერთაშორისო პარტნიორების მხრიდან არაერთხელ წამოჭრილა.