მზე, გართობა, დასვენება, მეგობრები, სიყვარული — ზაფხული სიახლეების, თავგადასავლებისა და დაუვიწყარი ისტორიების სეზონია. ამ ყველაფრის გამოსაცდელად კი ყოველთვის სახლიდან გასვლა საჭირო არაა — ახალი და შთამბეჭდავი სამყაროები ხშირად შენი წიგნის თაროზე, წიგნებში იმალება.

თუ გინდა ზაფხული წიგნის ფურცლებიდან შეიგრძნო და მზიანი დღეები ნაყოფიერად გამოიყენო, ქარჩხაძის გამომცემლობა 3 წიგნს გთავაზობს, რომელიც საზაფხულო განწყობას შეგიქმნის.

1. ლილი კინგის მწერლები და საყვარლები

ლილი კინგის უჩვეულო იუმორითა და დასამახსოვრებელი პერსონაჟებით მოთხრობილი რომანის მთავარი გმირი ახალგაზრდა ქალი ქეისია, რომელიც 1997 წელს მასაჩუსეტში მიემგზავრება. დედის სიკვდილით დასევდიანებული ქეისი ცდილობს, დაწყებული წიგნი დაასრულოს, საკუთარი გზა იპოვოს და რომანტიკულ ურთიერთობებშიც გაიკვლიოს გზა.

სიყვარული, საყვარელი ადამიანის გარდაცვალებით გამოწვეული მწუხარება, შთაგონების წყაროს დაკარგვა, ფინანსური და ზრდასრულობისთვის დამახასიათებელი სხვა პრობლემები — რომანის მთავარ გმირთან საერთო ენის გამონახვა ნებისმიერ მკითხველს შეუძლია.

თუ შენთვის ზაფხული ახალ, თავბრუდამხვევ და დაუვიწყარ თავგადასავლებთან ასოცირდება, თანაც არც ცხოვრების ახალ ეტაპზე გადასვლის სურვილია უცხო, ქეისის ისტორიას ვერ მოწყდები. წიგნის სიუჟეტი იმდენად ჩაგითრევს, რომ ზაფხულის გაუსაძლისი სიცხეც კი დაგავიწყდება.

2. დელია ოუენსის იქ, სადაც კიბორჩხალები მღერიან

თუ გინდა, შენს საზაფხულო თავგადასავალში მისტიკის ელემენტებიც შეიტანო, ამაში დელია ოუენსის სადებიუტო რომანი, სახელად იქ, სადაც კიბორჩხალები მღერიან დაგეხმარება.

წიგნის სიუჟეტი მეთევზეთა პატარა სოფელ ბარკლი ქოუვში ვითარდება, სადაც ყველას სმენია უცნაურ "მარშის გოგოს" შესახებ. "მარშის გოგოს" სინამდვილეში კაია კლარკი ჰქვია, რომელიც ცნობისმოყვარეობითა და ბუნების სიყვარულით გამოირჩევა. კაია ჭაობში ცხოვრობს, მარტოობა უყვარს და სამყაროს შესახებ ცოდნას თავად ბუნებისგან იღებს.

მიუხედავად იმისა, რომ მარტოობას შეჩვეულია, კაია სხვა ადამიანებთან ურთიერთობას მაინც ამყარებს. თუმცა როცა პატარა სოფელში საზარელი მკვლელობა ხდება, მთავარი ეჭვმიტანილი კაიაა, რომლის ცხოვრებაც რადიკალურად იცვლება.

აღსანიშნავია, რომ ივლისში რომანის მიხედვით გადაღებული ფილმი გამოვა, რომლის ნახვაც წიგნის წაკითხვის შემდეგ გაცილებით საინტერესო იქნება.

3. ჯულია ქუინის ჰერცოგი და მე

ზაფხული ხშირად ახალ და სუნთქვისშემკვრელ სასიყვარულო თავგადასავლებთან ასოცირდება. თუ თავბრუდამხვევი სიყვარულის ისტორიის წაკითხვა და რეალობიდან მე-19 საუკუნის ინგლისის არისტოკრატიულ საზოგადოებაში გადაბარგება გინდა, ჯულია ქუინის ჰერცოგი და მე შენთვის ზედგამოჭრილია.

ჰერცოგი და მე ბრიჯერტონის სერიის პირველი წიგნია. წიგნი 7 და-ძმასთან მცხოვრებ ლაღ დაფნი ბრიჯერტონზე მოგვითხრობს, რომელიც უამრავ კაცს ემეგობრება, თუმცა რომანტიკულ პარტნიორს ვერ პოულობს. დაფნისგან რადიკალურად განსხვავებულია ჰასტინგსის ჰერცოგი საიმონ ბასეტი, რომელსაც დაქორწინება არ უნდა. საკუთარი მიზნების მისაღწევად დაფნი და საიმონი საბედისწერო გარიგებას დებენ, რომელიც მათ ცხოვრებას რადიკალურად ცვლის.

ჯულია ქუინის ბრიჯერტონის სერია მსოფლიოში იმდენად პოპულარულია, რომ მასზე ნეტფლიქსმა სერიალი ბრიჯერტონიც გადაიღო. წიგნის წაკითხვის შემდეგ შეგიძლია, საყვარელი პერსონაჟები ეკრანზეც იხილო.

ქარჩხაძის გამომცემლობის წიგნები დაგეხმარება, ზაფხული ერთდროულად რამდენიმე შთამბეჭდავ სამყაროში უამრავ საინტერესო პერსონაჟებთან ერთად გაატარო.