ბანკების საზედამხედველო კაპიტალის მინიმალური ოდენობა 12-დან 50 მილიონ ლარამდე იზრდება. ეს გადაწყვეტილება ეროვნული ბანკის პრეზიდენტმა, კობა გვენეტაძემ მიიღო და შესაბამისი ბრძანება 2017 წლის 3 მაისს გამოსცა.

ამ ბრძანებით, საბანკო საქმიანობას ვერ დაიწყებს პირი, თუ მისი კაპიტალი 50 მილიონ ლარი არაა, მოქმედმა ბანკებმა კი კაპიტალი ამ ოდენობამდე 2018 წლის 31 დეკემბრამდე გაზარდონ.

საზოგადოება და ბანკების ეკონომიკური ანალიტიკოსი, გივი ადეიშვილი On.ge-სთან ამბობს, რომ აღნიშნული ცვლილება საბანკო პროდუქტების მომსახურებაზე არ აისახება, თუმცა ფინანსური სისტემის სტაბილურობაზე დადებითად იმოქმედებს.

"უნდა გავითვალისწინოთ, რომ საბანკო სექტორი პასუხისმგებელია დეპოზიტორების წინაშე, რაც იმას ნიშნავს, რომ მისი რესურსებით უზრუნველყოფილი უნდა იყოს დეპოზიტორების მიმართ არსებული ვალდებულებები. ამ კუთხით თუ შევხედავთ ამ გადაწყვეტილებას მისასალმებელია და შემცირდება რისკები საბანკო სექტორში," - ამბობს საზოგადოება და ბანკების ეკონომიკური ანალიტიკოსი.

ბრძანების გამოცემამდე დაახლოებით ორი თვის წინ, ფინკა ბანკმა განცხადება გაავრცელა. განცხადებაში ბანკის აღმასრულებელი დირექტორი, ვუსალ ვერდიევი აღნიშნავდა, რომ მათი კომპანია გამოთქვამდა მზადყოფნას კაპიტალის ზრდასთან დაკავშირებით.

განახლება: 10 მაისს ფინკა ბანკმა On.ge-ს აცნობა, რომ კაპიტალის ზრდის ვალდებულება საბანკო მომსახურებას არ გააძვირებდა.