თბილისის მერია ცილისწამებას და სიცრუეს უწოდებს პოლიტიკური პლატფორმა ახალი საქართველოს მიერ, დღეს გაკეთებულ განცხადებას, უფასო სასადილოებში კორუფციული სქემის არსებობის შესახებ.

მერია პარტიას მოუწოდებს, რომ თუკი ასეთი ინფორმაცია არსებობს, შესაბამისი დოკუმენტები შემდგომი რეაგირებისთვის სამართალდამცავ ორგანოებს გადასცეს. ამის შესახებ განცხადება თბილისის მერიის ჯანდაცვისა და სოციალური მომსახურების საქალაქო სამსახურის უფროსმა გელა ჩივიაშვილმა დღეს ბრიფინგზე გააკეთა.

როგორც გელა ჩივიაშვილმა აღნიშნა, მნიშვნელოვანია ის ფაქტორიც, რომ თბილისის მერიის მოთხოვნის საფუძველზე, სურსათის ეროვნული სააგენტო, წელიწადში მინიმუმ ორჯერ ყველა უფასო სასადილოში ამოწმებს სანიტარულ ნორმებსა და საკვების ხარისხს.

დღეისათვის უფასო სასადილოების ერთჯერადი ცხელი სადილით, რომლის კილოკალორაჟი შეადგენს 1100 კკალორიას, 39 ათასამდე ბენეფიციარი სარგებლობს.

დღეს, 8 მაისს, სამოქალაქო პლატფორმამ ახალი საქართველო სამთვიანი მონიტორინგის შედეგები გამოაქვეყნა და თბილისის მერია, გამგეობები და თბილისის საკრებულო კორუფციაში დაადანაშაულა.

გიორგი ვაშაძის განცხადებით, საქმე ეხება სოციალურად დაუცველი მოსახლეობისთვის გახსნილ უფასო სასადილოებს.

ვაშაძის მტკიცებით, 39 ათას 251 რეგისტრირებული ბენეფიციარიდან 20 ათასზე მეტი უფასო სასადილოებით არ ან ვერ სარგებლობს, მერია კი 39 ათასზე მეტი ბენეფიციარისთვის განკუთვნილ თანხას ურიცხავს კომპანიებს. ახალი საქართველოს ლიდერი ირწმუნება, რომ 10 მილიონამდე ლარი მაღალი თანამდებობის პირების ჯიბეში მიდის.