საქართველოს საგარეო საქმეთა სამინისტროს ცნობით, სასტუმროების დასაჯავშნ ვებსაიტზე, Booking.com-ზე ხარვეზის ძირითადი ნაწილი გასწორებულია და აფხაზეთი საქართველოს ნაწილადაა მითითებული. ამის შესახებ საგარეო უწყებამ განცხადება დღეს გაავრცელა:

"ვებგვერდის 40-მდე სხვადასხვაენოვან ვერსიაში search-ის ფუნქციაში ოკუპირებული აფხაზეთის რეგიონსა და მის ყველა ქალაქს გვერდით საქართველო მიეთითა. ეს ფუნქცია გასასწორებელი დარჩა მხოლოდ რამდენიმე ენაზე. კომპანიასთან მუშაობის შედეგად, ახლახანს შევთანხმდით, რომ კიდევ ერთხელ გადაიხედება ვებგვერდის ყველა ტექნიკური ხარვეზი, რაც აფხაზეთის, როგორც ქვეყნის რაიმე ფორმით ხსენებას უკავშირდება, და გასწორდება საერთაშორისო სამართლის შესაბამისად.

ამავე მიმართულებით ვმუშაობთ კომპანია Airbnb-თანაც. საქართველოს საგარეო საქმეთა სამინისტრო მუშაობს ყველა შემთხვევაზე, როცა ამა თუ იმ ვებგვერდზე საქართველოს ოკუპირებული რეგიონები მოცემულია ქვეყნების ჩამონათვალში. უმეტეს შემთხვევებში ეს არის ტექნიკური ხარვეზი. სწორედ ამიტომ ყველა იმ შემთხვევაში, როცა უწყება უკავშირდება კომპანიებს, ისინი ასწორებენ ვებგვერდზე არსებულ ხარვეზებს. ცხადია, არ იგულისხმება რუსული ვებგვერდები."

როგორც On.ge რამდენიმე დღის წინ წერდა, Booking.com-ზე მომხმარებლის პროფილის რედაქტირებისას და სასტუმროების მფლობელებისთვის ინფორმაციის განთავსებისას, აფხაზეთი მითითებული იყო როგორც ცალკე ქვეყანა.