შინაგან საქმეთა სამინისტროს საპატრულო პოლიციის დეპარტამენტის ინფორმაციით, 31 მაისს პოლიციელის დღისადმი მიძღვნილ ღონისძიებასთან დაკავშირებით, კახეთის გზატკეცილზე 10:30 საათიდან 12:00 საათამდე ავტომობილების მოძრაობა შეიზღუდება.

უწყების ცნობით, წულუკიძის მოედნიდან ჩამომსვლელ მ.ლაღიძის ქუჩაზე ტრანსპორტის მოძრაობა აიკრაძალება. ავტომობილები იმოძრავებენ 17 შინდისელი გმირის ქუჩის გავლით, ჯავახეთის ქუჩის მიმართულებით.

ასევე, ჯავახეთის ქუჩაზე ამომავალი პანდუსი დაიკეტება და ავტომობილები ჯავახეთის ქუჩაზე, მოსკოვის გამზირის მიმართულებით იმოძრავებენ. ამასთან, ავტომობილებისთვის მოძრაობა ქალაქის ცენტრის მიმართულებითაც შეიზღუდება და გადაადგილება შესაძლებელი იქნება კახეთის გზატკეცილიდან ჯავახეთის ქუჩისკენ ჩამსვლელი პანდუსით.

"ამასთანავე, გაცნობებთ, რომ 31 მაისს, საპატრულო პოლიციის დეპარტამენტის ერთიანი მომსახურების თბილისის, მცხეთისა და რუსთავის სერვისცენტრები და სატელეფონო მომსახურების ცენტრი არ იმუშავებს. მოქალაქეები საპოლიციო სერვისების მიღებას შეძლებენ ლაღიძის ქუჩაზე განთავსებული ექსპრესს ფილიალის საშუალებით 09:00 საათიდან 18:00 საათამდე", — აღნიშნულია ინფორმაციაში.