ვინი პუჰი ბევრი ჩვენგანის ბავშვობის ტკბილი მოგონებაა — ამ კეთილი დათუნასა და მისი მეგობრების თავგადასავალი დღემდე რჩება პატარების საყვარელ ისტორიად. თუმცა, საყვარელი ნამდვილად არ ეთქმის ახალ ფილმს, რომელიც ამ გმირზე გადაიღეს.

ასი აკრის ტყეში ამჯერად კოშმარების დრო დამდგარა. საშინელებათა ჟანრის ფილმში ვინი პუჰი: სისხლი და თაფლი, ჩვენი საყვარელი პერსონაჟები შემაძრწუნებელ არსებებად გვევლინებიან.

სიუჟეტის მიხედვით, ქრისტოფერ რობინისგან მიტოვებული პუჰი და მისი საუკეთესო მეგობარი, გოჭუნა, ბოროტმოქმედებად იქცევიან. მიუხედავად იმისა, რომ ფილმის ტრეილერი ჯერ არ გამოქვეყნებულა, სიუჟეტი უკვე საკმარისად შავ-ბნელი ჩანს — რომ აღარაფერი ვთქვათ პერსონაჟების გარეგნობაზე: გოჭუნა, არც მეტი, არც ნაკლები, ეშვებით!

ფოტო: Jagged Edge Productions

ფოტო: Jagged Edge Productions

საშინელებათა ჟანრის ამ ფილმს დისნეისთან საერთო არაფერი აქვს. საქმე ისაა, რომ ა.ა. მილნის ორიგინალური ნაწარმოები წელს საზოგადოებრივ საკუთრებად იქცა, ამდენად მისი ინტერპრეტაციისა და ადაპტირების საშუალება ნებისმიერ ხელოვანს მიეცა. სისხლის და თაფლის გამომშვებ კინოსტუდია Jagged Edge Productions-ს კი ახალი ჰორორის გადაღებაზე ბევრი არ უყოყმანია.

ფილმი სულ რაღაც 10 დღეში გადაიღეს. თუმცა, ჯერჯერობით, უცნობია, როდის იხილავს მას მაყურებელი, რადგან რეჟისორ რის უოტერფილდის თქმით, გადაღების შემდგომი პროცესი გაიწელა.

სხვათა შორის, ჩვენთვის ნაცნობ ბევრ პერსონაჟს ფილმში საერთოდ ვერ ვიხილავთ — მათ შორის, არც ვეფხვს. გამოქვეყნებული კადრები კი ერთგვარ სპოილერსაც შეიცავს, რადგან იო-იოს საფლავის ქვას ვხედავთ; თუმცა, ჯერ სად ხართ — როგორ მოკვდა, არ იკითხავთ? მოშივებულმა პუჰმა და გოჭუნამ შესანსლეს.

მოკლედ, ალბათ უკვე საკმარისად ბევრი რამ ვიცით ამ ახალ ფილმზე, რათა გადავწყვიტოთ, გვსურს თუ არა მისი ყურება.

ფოტო: Disney

ვინი პუჰზე სრულმეტრაჟიანი ფილმი გადაიღეს რამდენიმე წლის წინაც, სადაც ქრისტოფერ რობინი იუენ მაკგრეგორმა განასახიერა.