21 წლის რუსმა ჯარისკაცმა უკრაინელ ქვრივს სთხოვა, რომ მისთვის ქმრის მკვლელობა ეპატიებინა. ჯარისკაცმა თავისი დანაშაული კიევის სასამართლო პროცესზე აღიარა, რომელზეც უკრაინის ტერიტორიაზე რუსი სამხედროების მიერ ჩადენილ დანაშაულებს განიხილავენ.

რუს ჯარისკაც ვადიმ შიშიმარინს 28 თებერვალს ველოსიპედზე მჯდომი უიარაღო კაცის მკვლელობაში ადანაშაულებდნენ, რაც ომის სამართლის დარღვევაა. ვადიმმა მოგვიანებით დანაშაული აღიარა და მოკლული კაცის ქვრივს პატიება სთხოვა.

"მესმის, ვერ მაპატიებთ, მაგრამ პატიებას ვითხოვ", – ასე მიმართა რუსმა ჯარისკაცმა გარდაცვლილი კაცის ცოლს.

ფოტო: Reuters

სასამართლო პროცესზე მოკლულის ცოლმა კიდევ ერთხელ გაიხსენა მისი ქმრის გარდაცვალების დღე და აღნიშნა, რომ გასროლის ხმა თავადაც გაიგონა. "მაშინვე ჩემს ქმარს მივვარდი, მაგრამ ის უკვე მკვდარი იყო. მას თავში ესროლეს და ამის დანახვაზე ბევრი ვიკივლე", — თქვა პროცესზე მოკლულის ცოლმა აკანკალებული ხმით.

ქალის თქმით, მისი ქმარი შეუიარაღებელი და სამოქალაქო ტანსაცმელში გამოწყობილი იყო, როცა თავში ესროლეს. მათ 27 წლის ვაჟი და 2 შვილიშვილი ჰყავთ.

დანაშაულის აღიარების შემდეგ პროკურორები ითხოვენ, რომ რუს ჯარისკაცს სამუდამო თავისუფლების აღკვეთა მიესაჯოს. მოკლულის ცოლი კი თანახმაა, რომ შიშიმარინი აზოვსტალის დამცველებში გაცვალონ.

უკრაინის მთავრობა რუსეთს მშვიდობანი მოსახლეობის წინააღმდეგ ბრძოლაში ადანაშაულებს და მათივე თქმით, უკვე 10 ათასზე მეტი ომის დანაშაულის დადგენაა შესაძლებელი. რუსეთის მთავრობა კი ბრალდებებს უარყოფს და არც სამხედრო დანაშაულებში მონაწილეობას აღიარებს.