ერინ იულსონი და მისი 2 წლის ძაღლი ჩრდილოეთ კალიფორნიაში მდინარის მახლობლად სეირნობდნენ, როცა ქალს პუმა თავს დაესხა. როგორც თავად ქალი იხსენებს, პუმამ ქურთუკი შემოახია, მკლავი დაუკაწრა და დაუღრიალა. "დავიყვირე ევას სახელი და ის მაშინვე მოვიდა", — თქვა ქალმა ძაღლის შესახებ და დასძინა, რომ მისმა ოთხფეხა მეგობარმა პუმას თავდაპირველად ძლიერად დაარტყა.

"ისინი რამდენიმე წამის განმავლობაში იბრძოდნენ, შემდეგ კი ევას ტირილი გავიგონე", — ამბობს ქალი. ძაღლის პატრონი ქვების სროლით ცდილობდა 2 წლის ევას გათავისუფლებას, თუმცა პუმა მას არ უშვებდა. შემდეგ კი ქალმა გადაწყვიტა, რომ
ავტომობილებისკენ წასულიყო და დახმარება გამვლელი მძღოლებისთვის ეთხოვა.

ევას პატრონს ქალი, სახელად შენონი დაეხმარა, რომელიც იმ ტერიტორიაზე ავტომობილით მოძრაობდა. უილსონმა და შენონმა პუმას მოგერიება სააბაზანოს მილებისა და წიწაკის სპრეის მეშვეობით შეძლეს და ევა ასე გადაარჩინეს.

ფოტო: GOFUNDME

"თავიდან ვიფიქრე, რომ ევა კარგად იყო, შემდეგ დავინახე, რომ სახეზე ჭრილობები ჰქონდა და პირიდან სისხლის სდიოდა", — ამბობს უილსონი. ძაღლი ვეტერინარულ კლინიკაში მალევე გადაიყვანეს და მისი გადარჩენა შეძლეს.

"მან ყველა საჭირო წამალი მიიღო და კიდევ ერთ ღამეს ვეტერინართან გაატარებს. საბედნიეროდ, მან ყველაფერს გაუძლო და გადაუდებელი მკურნალობაც დროულად მიიღო. ევას თავის ქალას მიდამოებში 2 მოტეხილობა აქვს, ხოლო მისი მარცხენა თვალი შეშუპებულია, რაც მხედველობას უქვეითებს. თუმცა ვეტერინარი ოპტიმისტურადაა განწყობილი და სხვა ყველაფერი რიგზეა", — წერს ევას პატრონი ინსტაგრამზე.

ამ ამბის გაგების შემდეგ ევას დახმარების სურვილი უამრავმა ადამიანმა გამოხატა. ვებსაიტ GoFundMe-ზე ევას დასახმარებლად უკვე 21 ათასი დოლარი ჩაირიცხა, როცა მხოლოდ 7,500 დოლარი იყო საჭირო.

"ის ჩემი გმირია და მისგან სიცოცხლით ვარ დავალებული", — წერს ევას პატრონი.