სასიხარულო ამბავი HBO-ს საკულტო სერიალ სამეფო კარის თამაშების თაყვანისმცემლებისთვის, ტელეარხმა უკვე გააფორმა კონტრაქტი ოთხ სცენარისტთან, რომლებიც სერიალის გაგრძელებაზე ჯორჯ მარტინთან ერთად იმუშავებენ.

ეს იქნება პირველი შემთხვევა, როდესაც არხი მისი ყველაზე პოპულარული სერიალის სპინოფს გადაიღებს. რაც გულისხმობს იმას, რომ ახალ ოთხ სერიალში ამავე სამყაროში მომხდარ სხვა მოვლენებს ვნახავთ, სხვა პერსონაჟებით და სხვა მითოლოგიით. რომელ პერიოდში განვითარდება ეს ისტორიები ან რომელი გვარის შესახებ იქნება ახალი ეპოსი, ჯერ არ ვიცით. ეს შეიძლება იყოს შვიდი სამეფოს რომელიმე მიყრუებული ქალაქისა და ციხე-კოშკის ისტორია, თავისუფალი ქალაქების ისტორია, შეიძლება სულაც პრიქველი შემოგვთავაზონ და ვნახოთ რა ხებოდა რკინის ტახტზე ბარათეონების აღზევებასა და დაცემამდე. ჯორჯ მარტინის შექმნილი სამყარო იმდენად დიდი და მრავალფეროვანია, რომ იქ ახალი ისტორიებისა და სიუჟეტების მოფიქრება ნამდვილად არ გაუჭირდებათ.

ერთ-ერთი სპინოფის თემა შესაძლოა ახალგაზრდა ნედ სტარკის ისტორია იყოს, რომელზეც "სამეფო კარის თამაშებში" რამდენჯერმე გაამახვილეს ყურადღება.

საინტერესო იქნება ახალგაზრდა ობერინ მარტელის ამბავიც, რომელმაც თავის დროზე დორნი დატოვა და ესოსში წავიდა სამოგზაუროდ.

ახალი ნაწილების გადაღებებში სამეფო კარის თამაშების შემქმნელები დეივიდ ბინიოფი და დენ უეისი მონაწილეობას არ იღებენ, თუმცა ამბობენ, რომ ამ იდეის განხორციელებას მხარს უჭერენ.

"ყველაფერი შთამბეჭდავად მიდის. მეშვიდე სეზონის დასრულების შემდეგ ბინოფი და უეისი მუშაობას მერვე სეზონზე დაიწყებენ და ვიცით, რომ ამით უდიდეს ისტორიას დავასრულებთ", - ამბობენ HBO-ში.

ჯერ-ჯერობით უცნობია ისიც, რა თანამიმდევრობით გავა სერიალი ეთერში, იქნება ოთხივე სერიალი ერთდროულად თუ ეტაპობრივად.

"ჩვენ ველოდებით სცენარებს, მხოლოდ ამის შემდეგ გადაწყდება როგორ და როდის დავიწყებთ ახალ პროექტებზე მუშაობას", - ამბობენ HBO-ში.

ჯორჯ მარტინთან ერთად ახალ სცენარებზე ჯეინ გორდონი, კარლი ვრეი, მაქს ბორენსტენი და ბრაიან ჰელგელენდი იმუშვებენ.

თუმცა ვიდრე HBO საკულტო სერიალის ოთხ ახალ გაგრძელებას შემოგვთავაზებს, შეგახსენებთ, რომ სამეფო კარის თამაშების მეშვიდე სეზონის პრემიერა HBO-ზე 16 ივლისს შედგება.