"ჩვენი სიმამაცე შთაბეჭდილებას ახდენს მსოფლიოზე, ჩვენი მუსიკა იპყრობს ევროპას!" — ასე ეხმაურება, ვოლოდომირ ზელენსკი ევროვიზიაზე უკრაინის გამარჯვებას. მან მხარდაჭერისთვის ყველას მადლობა გადაუხადა და აღნიშნა, რომ ევროვიზია ერთ დღეს თავისუფალ და აღდგენილ მარიუპოლშიც ჩატარდება.

"მომავალ წელს ევროვიზიას უკრაინა უმასპინძლებს! მესამედ თავის ისტორიაში და მჯერა — არა უკანასკნელად. ყველაფერს გავაკეთებთ, რომ ერთ დღეს თავისუფალ, მშვიდობიან და აღდგენილ მარიუპოლში ვუმასპინძლოთ ევროვიზიის მონაწილეებსა და სტუმრებს. მადლობა გამარჯვებისთვის Kalush Orchestra-ს და ყველას, ვინც ხმა მოგვცა! დარწმუნებული ვარ, მტერთან ბრძოლაში ჩვენი გამარჯვების აკორდი შორს არ არის", — წერს ზელენსკი.

2022 წლის ევროვიზიის სიმღერის კონკურსის გამარჯვებული უკრაინა გახდა. ქვეყნის წარმომადგენელმა ჯგუფმა KALUSH ORCHESTRA-მ ფინალში სიმღერა Stefania შეასრულა და 631 ქულით უკრაინას ევროფესტივალზე მესამე გამარჯვება მოუტანა. აღსანიშნავია, რომ ბენდმა ტელემაყურებლისგან უმაღლესი, 439 ქულა დაიმსახურა, სხვადასხვა ქვეყნის ჟიურისგან კი 5-ჯერ მიიღო ასევე უმაღლესი შეფასება — 12 ქულა.

საკონკურსო სიმღერის შემდეგ უკრაინულმა Kalush Orchestra-მ ევროვიზიის სცენიდან მსოფლიოს მიმართა და აზოვსტალის დახმარებისკენ მოუწოდა.

"გთხოვთ, დაეხმარეთ უკრაინას, მარიუპოლს! დაეხმარეთ აზოვსტალს, ახლავე".

საქართველოს ეროვნულმა ჟიურიმ უკრაინას 6 ქულა დაუწერა, ტელემაყურებელმა კი — 12. ამას საზოგადოების კრიტიკა მოჰყვა. საზოგადოებრივი მაუწყებელი ვებგვერდზე ჟიურის განცხადებას ავრცელებს, სადაც ინფორმაციას უარყოფს და ამტკიცებენ, რომ ეროვნულმა ჟიურიმ ყველაზე მაღალი 12 ქულა უკრაინას მიანიჭა, ამის ამსახველი, ნოტარიულად დამოწმებული დოკუმენტი კი ევროვიზიის ორგანიზატორებს გადაუგზავნეს და დეტალებს არკვევენ.