საქართველოს რაგბის ნაკრების კაპიტანმა, მამუკა გორგოძემ, მსოფლიო თასის გათამაშებამდე ორი წლით ადრე, ნაკრები დატოვა. ამის შესახებ ინფორმაცია საქართველოს რაგბის კავშირის ვებგვერდზე გამოქვეყნებული.

"უკვე 33 წლის ვარ და 2019 წლის მსოფლიო თასის დროს 35-ს ვიქნები გადაცილებული. ვამჩნევ, რომ ასაკში ვარ და წლების მატებასთან ერთად დაღლილობა კი არ დაიკლებს, კიდევ უფრო მოიმატებს. მირჩევდნენ, რომ მხოლოდ მსოფლიო თასისთვის მოვმზადებულიყავი, მნიშვნელოვან თამაშებზე ჩამოვსულიყავი, მაგრამ ჩემთვის ეს მიუღებელია! კაპიტანი სულ გუნდთან ერთად უნდა იყოს, მის პულსზე უნდა ედოს ხელი, სხვა შემთხვევაში კაპიტანი ვერ იქნები," - აცხადებს ნაკრების ყოფილი კაპიტანი.

როგორც გორგოძე ამბობს, ნაკრებიდან წასვლას 2015 წლის მსოფლიო თასის შემდეგ აპირებდა, თუმცა, სთხოვეს და დარჩა.

"მინდა, რომ გულშემატკივარს კარგად დავამახსოვრო თავი და ვგრძნობ, წასვლის დრო მოვიდა," - ამბობს ის.

მისი თქმით, ის ნაკრებს დააკლდა, მაგრამ შეუცვლელი არავინაა.