9 მაისს, მეორე მსოფლიო ომში ფაშისტურ გერმანიაზე გამარჯვების დღეს, რუს მოტოციკლეტისტთა კლუბი ღამის მგლები საქართველოში ჩამოსვლას და ვაკის პარკში აქციის მოწყობას გეგმავს.

ღამის მგლები კრემლთან დაახლოებული კლუბია, რომელსაც ვლადიმერ პუტინთან მჭიდრო კავშირები აქვს.

საზოგადოების ნაწილი რუსი ბაიკერების თბილისში ჩამოსვლას აპროტესტებს. ისინი მთავრობასა და პრეზიდენტს მანიფესტით მიმართავენ:

"ცნობილია რომ ამა წლის 9 მაისისთვის კრემლის ხელისუფლებასთან აფილირებული და ევროპის ქვეყნებში non-grata-დ გამოცხადებული მოტოციკლეტისტთა ჯგუფი, "ღამის მგლები", აპირებს საქართველოს საზღვრის გადმოკვეთას და, ადგილობრივ პროპუტინურ ძალებთან ერთად, თბილისში ვაკის პარკში აქციის მოწყობას.

მოვითხოვთ, რომ საქართველოს სახელმწიფომ მკაფიოდ აჩვენოს ყველას, რომ ის ჩვენი ქვეყნის ინტერესების და ღირსების სადარაჯოზე დგას და არ დაუშვებს ამ ჯგუფის საქართველოში შემოსვლას".

მანიფესტს უკვე შეუერთდა 3 000 ხელმომწერი.

მოტოციკლეტისტები გუშინ პოლონეთში არ შეუშვეს.