საქართველოს დემოკრატიული ინიციატივის ცნობით, სასამართლომ შოთა დიღმელაშვილის განცხადება, რომ ნინო წილოსანი შპს "სანოს" მფარველი და ე.წ კრიშაა, ცილისმწამებად მიიჩნია და თქვა, რომ არღვევს პატივსა და ღირსებას. აქტივისტის თქმით, მას 100 ლარის გადახდა დაეკისრა.

"შოთა დიღმელაშვილმა სასამართლოში ყურადღება გაამახვილა იმ გარემოებაზე, რომ განცხადებების გაკეთების დროს ის მოქმედებდა როგორც ჟურნალისტი და მან საზოგადოებას გააცნო საჯარო წყაროებიდან მიღებული ინფორმაცია ქართული ოცნების დეპუტატის კავშირის შესახებ შპს სანოსთან, რომელმაც, აუდიტის სამსახურის მონაცემებით, სახელმწიფოს მიერ ქუთაისელი უსახლკაროებისთვის გამოყოფილი თანხიდან დაახლოებით ორი მილიონი ლარით მეტი დაუსაბუთებლად აიღო.

მოპასუხემ განმარტა, რომ მის მიერ გაჟღერებული დასკვნები საჯარო წყაროებში არსებულ ინფორმაციას ეყრდნობოდა. ამასთან, ხაზი გაუსვა იმ გარემოებას, რომ ნინო წილოსანი წარმოადგენს მაღალი თანამდებობის მქონე პირს, რომელსაც მსგავსი განცხადებების მიმართ თმენის მეტი ვალდებულება გააჩნია", — წერს GDI.

ორგანიზავიის განცხადებით, სამოქალაქო აქტივისტმა 2019 წელს გადაცემა სირცხვილიას პირდაპირ ეთერში განაცხადა, რომ ნინო წილოსანი იყო შპს სანოს მფარველი, ე.წ კრიშა. მათივე ცნობით, ნინო წილოსანი სარჩელში უთითებდა, რომ მსგავსი ინფორმაციის გავრცელებით მას შეელახა პატივი და ღირსება, რის გამოც მან მოითხოვა გავრცელებული ცნობების უარყოფა.

"საყურადღებოა, რომ ჟურნალისტების მიერ გაკეთებული კრიტიკული განცხადებები არაერთხელ ყოფილა სასამართლო დავის დაწყების საფუძველი, განსაკუთრებით, ხელისუფლების წარმომადგენლების ინიციატივით. მსგავსი ტენდენცია წარმოადგენს სასარჩელო მექანიზმის ბოროტად გამოყენებას და მიზნად ისახავს ჟურნალისტების/მედიის გაჩუმებასა და სიტყვისა და გამოხატვის თავისუფლების უკანონო შეზღუდვას (ე.წ. SLAPP სარჩელები).

ხელისუფლების წარმომადგენლების მხრიდან უსაფუძვლო სარჩელების შეტანის ტენდენციის გათვალისწინებით კი, ზემოაღნიშნული გადაწყვეტილება ქმნის განსაკუთრებულად საშიშ პრეცედენტს, ვინაიდან არსებობს იმის მოლოდინი, რომ საჯარო პირების მხრიდან გაიზრდება სიტყვისა და გამოხატვის თავისუფლების მართლმსაჯულების ობიექტად ქცევის შემთხვევები", — ნათქვამია ორგანიზაციის განცხადებაში.