საქართველოს შინაგან საქმეთა სამინისტროს ინფორმაციით, 28 აპრილს არასრულწლოვანი გოგოს გატაცებაში ბრალდებული თავისუფალია. უწყების პრესსამსახურმა On.ge-ს განუცხადა, რომ პირი გატაცებულის [გოგოს] ჩვენების საფუძველზე გაათავისუფლეს, გამოძიება კი გრძელდება.

სკოლაში მიმავალი არასრულწლოვანი გოგო 28 აპრილს ქვემო ქართლში, ცოლად მოყვანის მიზნით, გაიტაცეს. საქმეზე გამოძიება სისხლის სამართლის კოდექსის 143-ე მუხლით მიმდინარეობს, რაც თავისუფლების უკანონო აღკვეთას გულისხმობს და ისჯება პატიმრობით ორიდან ოთხ წლამდე.

ქალთა უფლებების დასაცავად ქალთა მოძრაობა დღეს, 15 საათზე თბილისში, საქართველოს პროკურატურასთან აქციას მართავს. მოძრაობის წარმომადგენლები მიიჩნევენ, რომ სამართალდამცავი სტრუქტურები ქალის მოტაცებას ტრადიციად მიიჩნევენ და არა დანაშაულად. მსხვერპლისა და მისი ოჯახის მიმართ განხორციელებული ზეწოლით კი, ქალი ცრუ ჩვენებას აძლევს ნებაყოფლობით გათხოვების შესახებ.