ყველა დროის ერთ-ერთი ყველაზე წარმატებულმა ფეხბურთელმა კრიშტიანუ რონალდუმ 18 აპრილს სოციალურ ქსელებში გულშემატკივრებს სამწუხარო ამბავი გაუზიარა: კრიშტიანუსა და მისი პარტნიორის, ჯორჯინა როდრიგესის ახალშობილი ვაჟი გარდაიცვალა.

"მწუხარებით გატყობინებთ, რომ ჩვენი ახალშობილი ბიჭი გარდაიცვალა. ეს ნებისმიერი მშობლისთვის უდიდესი ტკივილია. მხოლოდ ჩვენი გოგოს დაბადება გვაძლევს ამ მომენტის მცირეოდენი იმედითა და ბედნიერებით გადატანის ძალას.

გვინდა, მადლობა გადავუხადოთ ექიმებსა და ექთნებს მათი პროფესიონალიზმისა და მხარდაჭერისთვის. განადგურებული ვართ ამ დანაკარგით და გთხოვთ, ამ მძიმე დროს განმარტოების საშუალება მოგვცეთ.

ჩვენო პატარა ბიჭო, შენ ჩვენი ანგელოზი ხარ და მუდამ გვეყვარები", — ვკითხულობთ წყვილის საერთო განცხადებაში.

კრიშტიანუმ ფანებს ოქტომბერში ახარა, რომ ის და ჯორჯინა ტყუპებს უკვე მეორედ ელოდნენ. მანჩესტერ იუნაიტედის ფეხბურთელმა ეს სიახლე ულტრაბგერით ფოტოსთან ერთად გაგვიზიარა.

კრიშტიანუს მხარდაჭერა მანჩესტერ იუნაიტედმა სოციალურ ქსელებში გამოუცხადა:

"შენი ტკივილი ჩვენი ტკივილია, რონალდუ. შენ და შენს ოჯახს სიყვარულსა და გამძლეობას გისურვებთ", — ვკითხულობთ განცხადებაში.