თურქეთში, მსოფლიოში ერთ-ერთი ყველაზე პოპულარული საიტი, ვიკიპედია დაბლოკეს.

BBC-ის ცნობით, ჯერ-ჯერობით უცნობია, რატომ შეიზღუდა საიტზე წვდომა.

"ტექნიკური ანალიზისა და სამართლებრივი განხილვის შედეგად, ინტერნეტის მართვის შესახებ კანონის შესაბამისად, ადმინისტრაციული ზომა იქნა მიღებული საიტთან დაკავშირებით," - განაცხადა თურქეთის ინფორმაციისა და კომუნიკაციის ტექნოლოგიების წარმომადგენელმა, მიზეზი კი უცნობი დარჩა.

თურქეთში აქამდეც დაბლოკილა სოციალური ქსელები როგორიცაა ფეისბუკი და ტვიტერი, თუმცა დროებით და ტერორისტული თავდასხმების დროს. ხელისუფლება ინტერნეტზე ცენზურის დაწესების მცდელობას უარყოფს.

ვიკიპედიაზე სხვა ქვეყნებშიც დაწესებულა ცენზურა, მაგალითად რუსეთსა და ჩინეთში.

გასული წლის გადატრიალების მცდელობის შემდეგ, თურქეთში 120 ათასზე მეტი ადამიანი დააკავეს სამოქალაქო სექტორიდან, სამართლადამცავ და სასამართლო უწყებებიდან, კიდევ 40 ათასი კი ტერორისტულ ჯგუფებთან შესაძლო კავშირის გამო.

თურქეთში, ასევე, დააკავეს 81 ჟურნალისტი, რითაც მსოფლიოში მოწინავე ადგილზეა.