რუსთავი 2-ის გენერალური დირექტორი ნიკა გვარამია სააპელაციო სასამართლოს დარბაზიდან გააძევეს. პროცესზე, სადაც რუსთავი 2-ის საქმე განიხილება, ნიკა გვარამია მოსამართლეს შეეკამათა, რის შემდეგაც მოსამართლე ნატა ნაზღაიძემ მას დარბაზი დაატოვებინა.

თავდაპირველად, სასამართლომ არ დააკმაყოფილა ტელეკომპანიის ადვოკატების შუამდგომლობა პროცესის გადადებასთან დაკავშირებით, რის შემდეგაც ნიკა გვარამიამ მოსამართლეები დაადანაშაულა მოსამართლე ურთმელიძისა და მინისტრ თეა წულუკიანის მსგავს მსჯელობაში.

მოსამართლე ნათია გუჯაბიძის თქმით, მას არაფერი სჭირს სხვისი გადაწყვეტილების გადასაწერი:

"შეადარეთ გადაწყვეტილებები და თუ დაემთხვევა, მანტიას გავიხდი".

ნიკა გვარამიამ მოსამართლეს უთხრა, რომ ის არ აპირებს მათთან "თამაშს", რის შემდეგაც ის დარბაზიდან გააძევეს. რუსთავი 2-ის დირექტორი ტაშით გააცილეს და მას დამსწრეთა ნაწილი გარეთ გაჰყვა.

ნიკა გვარამიას გაძევებამდე, მოსამართლემ დარბაზი დაატოვებინა მსახიობ ია ფარულავასა და ჟურნალისტ ელისო კილაძეს.