"მინდა გაცნობოთ, რომ დღეიდან ვბრუნდები პოლიტიკაში. ვბრუნდები იმისთვის, რომ ვაკეთო საქმე უკეთ იმ თანამოაზრეებთან ერთად ვინც მზადაა ქვეყნის სამსახურისთვის," - ამის შესახებ პარლამენტის ყოფილმა თავმჯდომარემ დავით უსუფაშვილმა დღეს გამართულ ბრიფინგზე განაცხადა.

უსუფაშვილი ახალ ცენტრისტულ პარტიას ქმნის და დაინტერესებულ პირებს გაერთიანებას სთავაზობს:

"ეს იქნება ცენტრისტული პარტია, რომელიც სხვადასხვა ფლანგიდან რაციონალურ და საჭირო ფორმულებს გამოიყენებს ქვეყნის აღმშენებლობისთვის. პარტია ხელს შეუწყობს ისეთი ქვეყნის შენებას, რომელსაც საძირკვლად ედება ქვეყნის მრავალსაუკუნოვანი ისტორიის პოზიტიური გამოცდილება, რომლის კედლები იქნება ფუნქციონირებადი დემოკრატიული ინსტიტუტებით და რომლის სახურავი იქნება ევროატლანტიკური სტრუქტურები."

უსუფაშვილის თქმით, პარტიის მთავარი ამოცანა იქნება მომავალ საპარლამენტო არჩევნებზე გამარჯვება და კოალიციური მთავრობის ჩამოყალიბება. დავით უსუფაშვილს დღეს თანაპარტიელების კონკრეტული გვარები არ დაუსახელებია.

დავით უსუფაშვილმა რესპუბლიკური პარტია 29 ოქტომბერს, საპარლამენტო არჩევნების შემდეგ დატოვა. მისი თქმით, მისი გადაწყვეტილების მიზეზი, პარტიის მომავალთან დაკავშირებით მის ლიდერებს შორის არსებული განსხვავებული პოლიტიკური ღირებულებები იყო.