საქართველოს რესპუბლიკური პარტია მიიჩნევს, რომ საქართველოს კონსტიტუციის ცვლილებების პროექტი არ შეესაბამება იმ ამოცანებსა და გამოწვევებს, რომელიც დღეს ქართული სახელმწიფოს წინაშე დგას.

პარტიის მიერ გავრცელებულ განცხადებაში ნათქვამია, რომ კონსტიტუცია, როგორც ქვეყნის უზენაესი კანონი, უნდა ეფუძნებოდეს ფართო საზოგადოებრივ კონსენსუსს, ასევე, ადგენდეს ხელისუფლების ბალანსის სამართლებრივ საფუძვლებს:

"ნათელი ხდება, რომ ცვლილებები ხელს უწყობს ერთპარტიული მმართველობის გამყარებას და ცუდ მდგომარეობაში აგდებს ოპოზიციურ პოლიტიკურ პარტიებს. შეიძლება ითქვას, რომ მოქმედი ხელისუფლება ზუსტად იმავე გზას დაადგა რასაც მისი ყველა წინამორბედი.

პროპორციულ სისტემაზე გადასვლა და 150 მანდატის პროპორციული წესით განაწილება პროგრესული ნაბიჯია, თუმცა ამავდროულად საარჩევნო ბარიერის კვლავ 5 პროცენტზე დატოვება, საარჩევნო ბლოკების შექმნის აკრძალვა და ბოლოს, გაუნაწილებელი მანდატების ყველაზე მეტი ხმის მიმღები პარტიისთვის გადაცემა, პრაქტიკულად არ ცვლის არსებულ რეალობას".

პარტია აცხადებს, რომ ხელისუფლება უფრთხის ევროპული მოდელის რეალურად შექმნას და პრინციპულად არ სურს ევროპის მრავალ განვითარებულ, დემოკრატიულ ქვეყანაში არსებული გამოცდილების მიღება და დამკვიდრება:

"კონსტიტუციის ცვლილებების პროექტი არ ასახავს დეცენტრალიზაციის პრინციპებს და არ ქმნის ძლიერი თვითმმართველობის შექმნისათვის კონსტიტუციურ საფუძვლებს".

რესპუბლიკურ პარტიას მიაჩნია, ქორწინების, როგორც ქალის და მამაკაცის ერთობის განსაზღვრის არანაირი საჭიროება არ არსებობდა.